Terbiye, elhalet hazihi bazı cühelânıñ zann ittigi kibi, balayı tazıyıq ve şiddet altında bulundırmaq dev kemik ile hiç bir vaqıt husula kelmez. Aksi olaraq, şu mamulât çocuğın ahlâq ve hissiyat-ı hasene-i tabiiyesini de mahv ve ibtal ider.

     Yalı boyı tatarlarınıñ bütün müşkiliyeti ziraat oldığından bu noqta-i nazar itibara almaq bizim için zaruriydir. Şükürler olsun ki, ziraat işi nazara çoq güzel köriniyur. Bu satırları yazan Qafqasda ve Türkistanda bulundığı zaman, Qırımdaki bağlara ve tarlalara tesaddüf idemedi. İş güzellikde degil, toprağa sarf olunan zahmetde ve beceriklikdedir. Qırımtatar bağcı ve bağçacısı Qafqaslı ve Türkistanlı qardaşlarını çalışmaqda çoq-çoq ileri kitmiş...

     Milliy meselelerde "Haq ses” refiqımız milliy muvaffaqiyetin can noqtasını milliy ittifaqda, "tatar qardaşlığında” körüyür.

    Şimdiye qadar Şarq milletlerine, bilhassa müslimanlara nim-vahşiy, qaba ve terbiyesiz bir kütleye baqan kibi baqırdılar. Hal-hazırda müslimanlar baş qaldırub her bir yerde kendini meydana atmaq isteyur. Qırım tatarı da bu doğrıda adımlar atıyur ve kendisini Qırım taliyi ile sıq bir rabitada körüyür.

Müellifniñ "Millet" gazetasından ğayırı daha sıra milliy kündelik neşirlerinde basılğanı haqqında bilgilerimiz bar. Hususan bizim baş proyektimiz bağışlanğan "Millet" gazetasında yazıcı Umer Necatiy Seydahmedov = Necatiy Seydahmedov = U. Necatiy Seydahmedov, kibi isim şekillerini qullana. olabile ki, bediy lağaplarını da qullanadır. Şindilik yalıñız üç ceryanını taptıq.

    Qırımtatar halqınıñ samimiy huddamı olğan Yaqub Fevziniñ bir-eki bibliografik malümatını qoştıq. Malümatnıñ dairesi daha keñ olmaq mümkün. Bu dairesini de bizim oquyıcılarımiz keñleştirmek mümkün. Ancaq "Bizim mutehassıslarımız" bölügimizde qayd etkenimiz kibi, "Millet" gazetasınıñ nüshaları Moskova, Almaniya ve olabile ki, başqa dünyaca belli kütüphanelerinde olmaq ihtimalı bar. İleride de aşağıda köstergen maqaleleriniñ bir-eki danesini de yerleştirmek hazırmız. 

   Mında Mehmed Arif özü ve başqa müellifler ile beraberlikte yazğan  gazeta maqaleleridir. Arap hurufatında olğanı içün bibliografiyada kösterilgen bazı adlarnıñ yazılışı şübheli. Böyleliknen isimniñ yanında arapça hariflerini qoştıq. Ümüt etemiz ki, mutehassıslarımız tarafından yapqan hatalarımız tüzetilir.

     1918 senesinden başlap 1919 senesine qadar ceryanlar. Bütün olaraq arap hurufatında, tili qırımtatarca. mevzular: tarih, medeniyet, siyaset, iqtisadiyet ve ilh.

    Peyğamberler kendilerine nazil olan sahifelerinde, kitablarında münderic-i hikemleri tehlükelere, işkencelere rağmen, var quvetleri ile tanıtmağa ğayret itmişler. İcabında kendilerine iman iden tarafdaranıyle birlikde qanlı muharebeleri intac iden tarızlara, hücumlara bile maruz qalmışlar. Faqat, haq ve haqiqatı müdafaa itmekden yine keri durmamışlar.