1918. – № 169. – Dekabr 8.

    Şeherimizde çoqdan beri beklenilen "Haq ses” gazetasınıñ birinci nomerosı cuma küni çıqdı. "Gazetamızın meslegi” unvanı baş maqalesinde iki refiqımız yazıyur: "Memleketin ğayet buhranlı şu zamanlarında, aralarında yaşadığımız ruslar ve sair milletler ile olan münasebetlerimizin nezaketi ve vaziyetin küçligi düşüncesidir ki, bize o milletler ile ahenkdar bir yol tutaraq, haqlarımızı maqul ve qanuniy suretler ile aramaq ve qavmimizin eyiliklerine, iqbaline bütün yüregimiz ve qudretimiz ile çalışmaq azm ve emeliyle "Haq ses”i çıqarmağa sadıq olıyur...”

    Soñra gazeta diyur: "Bizim Qırımın halı ve istiqbali hususındaki düşüncemiz inqilâb dolayısıyle memleketde hasıl olan vaziyetin "milletler-i muhakeme”sin de virilecek hükm ve qarara qır-i muhafazası”.

    Milliy meselelerde "Haq ses” refiqımız milliy muvaffaqiyetin can noqtasını milliy ittifaqda, "tatar qardaşlığında” körüyür.

    İkinci maqalede doktor Nuri efendi milliy işlerde sabit bir esası hazırlanmasından bahs iderek qorqıyur ki:"vuquata bitaraf qalmaq qaydı başqa manalarda qullanılub tatbiq idilmiş olsun” onıñ içün Nuri efendi "memleket hayatınıñ her nezahirinde imkânı, lüzümi derecesinde fikirimizi, reimizi söylemek ve bildirmek” tarafdarıdır.

    Qırımda resmiy "Millet” gazetasından başqa ğayr resmiy ve bitaraf bir gazetaya olan ihtiyacı bir qaç ay evel "Millet” sütünında yazmışdım ve dimişdim ki, Parlamento naşir-i efkârı, Parlamentonıñ ve onıñ sayladığı milliy müdiriyetiñ sorularını köstermege muvaffaq olamıyur. Bunıñ içün de işlerimiz bitaraf tenqidde istifade idemiyub bir taqım yañlışlara oğrayur. Bu noqta-i nazardan "Haq ses” refiqımızın vazifesi büyükdir. Yeñi arqadaşımıza muvaffaqiyetler dileyurız, milliy hayat ve hareketimizi iki taraflı ışıqlandıralım da haq yolı bulalım.