Syezde Qırımda mevcud umum volostnoy zemstvolardan birer; uyezd zemstvolarından ikişer; vilâyet zemstvosından üç, Aqmescid, Sevastopol ve Kerç şeherlerinden beşer, uyezd şeherlerinden üçer, uyezd şeheri olmayan şeherlerden birer kişi iştirak idecegi kibi «Tavrida» vilâyetinden meclis-i müessisana saylanmış doquz mebus dahi syezde iştirak idebileceklerdir.

İki kün muqaddem çıqqan «Millet»de «Yañlış fikirler» serlevhasıyle neşir itdigimiz maqalede Qırım Müslimanları İcra Komitesi ve Qırım inqilâb heyeti faaliyeti haqqında bazı vatandaşlarımızıñ ötede-beride söyledikleri sözlerin ve halqlar arasında dağıtdıqları şayiaların tamamen asılsız oldıqlarını beyan ile protesto itmiş ve haqiqat halın neden ibaret oldığını bütün tafsilât ve teferruatıyle añlatmışdıq.

Çoqtan beri kendisinden bahs idekeldigimiz siyasiy imtihan künleri keldi. Bugün, yarın ve o bir kün umum milletler ve siyasiy fırqalar, siyasiy imtihanlarını tutabilmek için imtihana kireceklerdir. Bu imtihandan ğalib çıqqanlar kendileriniñ terbiye-i siyasiyeye malik oldıqlarını kösterecekler. Tutamayanlar ise, o terbiye-i siyasiyeden mahrum oldıqlarını köstermekle beraber tarihları qarşusında mesul olacaq ve umum milletler ve fırqalar miyanetinde mevqisiz, itibarsız qalacaqlardır.

Qardaşlar! Saqın böyle sözlere ehemmiyet virmeyiñiz. Saqın, böyle bedefkârların neşir itdikleri haberlere qulaq asmayıñız! Saqın böyle teşviqatçıların tuzaqlarına düşmeyiñiz! Biliñiz ki böyle şayialar ancaq iki fena maqsadle neşir idiliyur. Bunlardan biri kendi namzed cedvelindeki kişilerden çoğını saylatmaq için siyasiy fırqalar tarafından yapılmaq ihtimalı vardır. İkincisi ise meclis-i müessisana olan intihabların icrasına mani olaraq bu suretle meclis-i müessisannıñ açılmasını tehire oğratmaqdır, ki bu ancaq bedefkârlar tarafından neşir idiliyur..

Bugün qırımtatarniñ tarihı ve merkeziy şehri olan Bağçasarayda üç milliy müessese açılıyur. Bunlardan biri – milletimiziñ çoqdan beri kendisine ihtiyacı olan ve büyük üstadımız merhum İsmail-bekin soñ emellerinden birini teşkil iden darulmuallimin mektebidir ki, bu ilim ve irfan ocağı büyük İsmail-bekin namına olaraq küşad idiliyur.

...artıq umum rusiyeniñ idaresini, umum milletlerin miqdaratını kendisine bağlayan merkez yıqılmış, knopkası parçalanmışdır. Binaenaleyh Rusiyeniñ tamamen mahv olmaması için yapılacaq yekâne bir çare varsa o da şekil-i hükümet ve tarz-ı idareniñ mülki muhtariyetli halq cumhuriyeti esası üzerine qurulmasını arzu ve talab iden milletlerin arzu ve talablarına qarşu kidilmeyüb haman olanların dileklerini esaf itmekdir. Aksi taqdirde, evelce dahi yazdığımız kibi, Petrograd ve Moskvada zuhur itmiş qanlı facialar az bir zamanda umum Rusiyeye sirayet idüb artıq ögi alınmayacaq bir dereceye kelir ki o zaman Rusiye ile vedalaşmaq icab idecek ve o zaman rusiyeliler qara milletlere burunmaya mecbur olacaqlardır.

Qırım muhafaza idilmelidir. Qırımın sulh ve asayişı bozulmamalıdır. Eger Vilâyet Komissarlığı bu hususda kendisinde acz his idiyursa, Qırımın idaresini, Qırımın taliyini Qırımın kendi oğullarına bıraqmalıdır. Qırımı Qırımlılardan başqa hiç kimse anarşiden qurtaramaz. Qırımı Qırımlılar qadar kimse sevmez, kimse muhafaza idemez. Qırım Müsliman İcra Komitesi ne suretle olursa olsun, tezlikle qırımtatar polkını Qırıma ketirmelidir. Tatar Atlı Polkı Qırıma kelmeyince, Qırımda sulh ve asayişın muhafaza idilebilecegi pek şübhelidir.

İdil boyı türk-tatar qardaşlarımız miqdarca millionlar teşkil itdikleri kibi, fikir, bilgi ve iqtisadiyece biz Qırımlılardan pek ileri oldıqlarından, bizler devir-i istibdadda oldığı kibi, hürriyet ve cumhuriyet derdinde dahi onları kendimize örnek ittihaz itmek ve onların kidecekleri yol ile kitmek isteyurdıq

Alman müdhiş toplarından atılan muharrib güllelere qarşı qal’a ve istihqamların muqavemet idemeyerek düşdikleri kibi, Alman diplomatları ağızından çıqqan söz ve tekliflerin de diplomat ve kabineleri suqut itdirdigi körülmekdedir. Qaç kün muqaddem gazetamızda istifasını haber virdigimiz Fransa Harciye Naziri müsyo Ribonıñ iş başından çekilmesini Almaniyanıñ sulh teklifi mucib oldığı tahaqquq itmişdir.

Müttefiqlar arasında aqd idilmiş muahede-i harbiyelerin tekrar yaqılması için pek yaqın bir zamanda Parisda bir konferentsiya yapılacağı gazetamızda yazılmışdı. Bu konferentsiyada, tabiiy, sulh meselesi de qozğalacaq, üç senelik muharebeniñ virdigi maddiy, maneviy kâr ve zararların da hesabı tertib idelecekdir. Müttefiqların bu konferentsiyaları münasebetiyle biz muharebe-i hazıranıñ medeniy avrupalıların kendi tabirlerince   «milletlerin hürriyet ve saadeti muharebesi»niñ beşeriye qaça mal oldığı haqqında «harbiy nihayetine qadar kötürmelidir!» diyen imperialistlerin nazar diqqatlarına qanlı bir hesab taqdim itmeyi münasib kördik.