Сонъки йыллары 1941-1945 сенелердеки дженк ве халкъымызнынъ сюргюнлиги акъкъында баягъы китап, макъалелер язылса да, тарихта шу девир яхшы беллидир, демеге мумкюн дегиль. Дженк ве сюргюнлик девирлерни теткъикъ этмек, огренмек  ичюн  даа чокъ-чокъ йыллар керек оладжакъ. Бу меселеде шу вакъиаларнынъ шаатларындан язылып алынгъан хатырлавлар гъает къыйметли бир весикъа олгъаныны унутмамакъ керекмиз. Уйкен несиль векиллеримизден бу малюматларны ярынгъа къалдырмай, язып алмакъ боюн-борджумыздыр. Бугунь биз «Къырым» окъуйыджыларына  1927 с. Дерекойде догъгъан Эскендер Осман огълу Текеджининъ хатырлавларыны теклиф этемиз

Хатырлавлар муэллифнинъ шивесинде язылып алынгъан.

– Меним бабам Осман Исмаил огълу догъма Кичик-Озенбашлыдыр (1896 с. догъды). Бабам  1,5 яшында олгъанда оны  Стамбулгъа алып кетелер. Анда о осьти-буюди, аскерликке алынды. 1914-1918 сенелерде I Джиан дженкинде тюрк ордусы сафларында Русиеге къаршы дженклешти. Эсир тюшти. Къазанда лагерьлерде олды. Бошагъан сонъ, Къырымгъа Дерекойге келип эвленди. Харысы багъчасарайлы Домбай Фериде Мурадасыл къызы эди (1897 с. догъды).

Дерекойде эв сатын алды. Бабам  НЭП вакътында къой союп, Ялтада ялыда кебаб япып сатар эди. Бабама Кебапчы Осман, дер эдилер.Хорантамызда 8 бала эдик.

1941 с. дженк башлагъан сонъ, бабам Османны дженкке алдылар. О 51-нджи армияда хызмет этти. Ор-къапуда (Перекопта) эсир тюшти.  Оны «Картофельный городок» деген ерге кетирдилер, деп эшиттик. Анда да ольмюш.

Дженк йыллары пек агъыр олды. Татам Айшени 1942 с. облаванен Ялтада алып  Германияя сюргюн эттилер.  Дженк битене къадар 1945 с. о анда (Австрияда Граци шеэринде) олды. Аркъадашларынен (Лена Дубинина, Шура Проскурня – Ливадиядан) американская зоная тюштилер. 1945 с. Ветангъа, Союзгъа къайттылар, оларгъа 10-ар йыл бердилер. 1955 сенеси Воркутада азат олдылар.

Мен 14 яшында олгъанда хорантамызны бакъмая арекет этер эдим. Партизаны станциясына, Мелитополь шеэрине шей денъишмее вара эдим. Лавровый лист (дефине япрагъы) махара йиплери, бабамызнынъ урбаларыны, одеколон, шаршафларны богъдайгъа ве мысырбогъдайгъа денъишир эдик.

1942 сенеси мен Чухурча коюнде яшая Фатма тиземе  майыс айында келип августкъадже чалыштым, сонъ Ливадияя хайтыр эдим. Тавшан базарда (Перевальное) геджелемеге тохтадым. Экинджи гедже Шумада бир татарда тохтадым. Учюнджи кунь кельдим Алуштая. Алуштадан чыха-джахта гирдим, бир хазах эвине. Сонъки биная, сорадым сув. Сув ичип бир километр юрген сонъ харшыма чыхты эки  доброволец. Сёйледим татарджа:  – Мы не понимаем, – дедилер. Менден документлер сорадылар. Мени алып кеттилер Алуштая, комендатурая. Хапаттылар.

Куньдюз ишлете эдилер. Казарма полуны ювар эдик, азбар сипирир эдик. Куньдюз саат 3-4-лерде: –   Ач олдум, – дедим. – Меним чувалым вар, анда отьмегим, – дедим. Чувалны сув ичкен еримде брахты эдим. Кельдик алмая лемсенен. Рус харысы бир отьмек верди. Учь сутка Алуштада туттылар. Сонъ машинанен Ялтая комендатурая кетирдилер. Анда метрикамны тешкерип йибердилер.

1943 сенеси облавая тюштим. Базара Ялтая одун сатар эдим. Базары сарып алып, сонъ  яшлары тутуп комендатурая кетирип, кимерсини Германияя ёллай, кимерсини лемселере ишлете эдилер. (уборка, окоп хазмах…). Мени окоп хазмая ёлладылар. Бир кунь чалыштым, сагъ ол да демедилер. Сонъ ахшама йибердилер. О заман 16 яшында эдим. Ливадияда полиция башлыгъы Потапович эди. Пек хаин эди. Полицайлар эписи хазахлар эди.

1943 сенеси  Ливадия оранжереясына багъчеван, гульджи олып ише  кирдим. Одун бычар, парлар эдик…Бир йыл чалыштым.

1944 с. апрельде лемселер Ахяра хачтыхта биз Ливадияда яшаян яш огъланлар (Жора ве Игорь Проскурня, Володя ве Коля Подрадилин, Эскендер, Энвер, Сервер Текеджилер) лемселер яшаян биналары гезер, араштырыр (шмон япар) эдик. Ливадия сарайында «Свитский корпус» деген бинада лемселер халын эки метра узунлыхтаки агъачлары биначе яхып киттилер. Биз бу агъачлары кенара чекип, сув тёкюп, атешни сёндюрдик.

Чох йыллар гечтиктен сонъ, 1967 сенеси, биз хачан Сухумдан Ливадияя вардых у заманда экскурсовод экскурсия гечирдикте «дженк вахтында бу бинаны лемселер яхтылар, партизанлар сёндюрдилер», — деди. Фактически, бу бинайы биз яш огъланлар хутардых. Атеши сёндюрдюх.

1944 сенеси апрельде бизни яшларны военкомат учёта алды. Дерекойе талимге къатнар эдик. Аскерликке аладжайдилер. 17 майыс куню ахшам саат 9-да эве хайттым. Ге-дже  саат 2-де келип оттюрдилер хапую. Анам турду, ачты хапую. Учь солдат кельди. 15 дахха вердилер: «– Выходи, выходи», – деп хычырдылар. Анам уятты бизи: – Бизи Хырымдан чыхарырлар, – деди. – 10 куньлюк ашамагъа алынъ , – дедилер. Машиная юклеп Ай-Петрден Сюрен станциясына кетирдилер. Тувар вагонларына юкледилер. 10 куньден сонъ Марийская АССР Волжск шеэрине тюштик. Стадиона бошаттылар. Алып кирдилер клубче. Сонъ анда эр кими  чешит ишке тайин эттилер.

Мен теплоэлектростанцияда ученик слесаря олдым. 1944 с. август-сентябрь айында Марийскийде комендантурая вардым, ялвардым: «Алынъ мени дженкке, бабам ичюн ахтыны алмая истерим», — дедим. Алмадылар. – Татарлары алмайрых, — дедилер. Сонъ вардым военкома бир хач гере.

— Хочу на фронт, мстить за отца, — дедим. Кена алмадылар. Учь-дёрт кере вардым ойле де алмадылар.

1956 сенеси Указ чыххан сонъ, Сухума кочьтик. 31 йыл анда яшадых.

Сухумда 1963 сенеси алдых сатын бир участок (5 сотка) сазлых ерде. Анда беш юз машина топрах тёктюрдик. Эр бир машина ичюн 4 — 25 кумюшке хадар пара бердик, сонъ эв хурдух,

1952 сенеси Сание Демирджиге эвлендим. Учь баламыз, 7 торунымыз, 5 торундан торун бар. 1987 сенеси Акъмесджите гочьтик.

Истегим: Украина укюмети халхымыза яшайыш версин, сыхмасын. Алла эр кезе сагълых, узун омюр версин. Яшасын бизим халхымыз, Ватанымыза саип олсун!

Язып алгъан Э. ОЗЕНБАШЛЫ.

P.S. Сание апте Демирджиден (1929 с. Алупка шеэринде догъды) 1949-50 сенелери Волжск шеэринде язылгъан бир шиирни язып алдыкъ ве оны окъуйыджыларнынъ дикъкъатына теклиф этемиз.

18 мая

18 мая ровно в 4 часа

К нам постучались и приказали:

«Вам собираться пора!»

Сердце невольно сжималось,

Слезы катились из глаз.

Мы торопились и торопились

И собирались в тот час.

Грубо и дерзко кричали:

«Эй, выходи, поскорей!»

Времени нету с вами возиться.

Брось барахло, не жалей!»

Выходим из дома родного

Нас там вагоны уж ждут.

Дети в испуге, все как заплачут

«Мама, куда нас везут?»

Нас посадили в машины

Точно на свалку везут.

Господи, Боже в чем виноват

Бедный, несчастный народ?

Крымское море да солнце.

Только «прощай», говорит.

Нет тут ни близких, нет ни знакомых,

Чтоб сердце пред ними открыть...