Çoqtan beri kendisinden bahs idekeldigimiz siyasiy imtihan künleri keldi. Bugün, yarın ve o bir kün umum milletler ve siyasiy fırqalar, siyasiy imtihanlarını tutabilmek için imtihana kireceklerdir. Bu imtihandan ğalib çıqqanlar kendileriniñ terbiye-i siyasiyeye malik oldıqlarını kösterecekler. Tutamayanlar ise, o terbiye-i siyasiyeden mahrum oldıqlarını köstermekle beraber tarihları qarşusında mesul olacaq ve umum milletler ve fırqalar miyanetinde mevqisiz, itibarsız qalacaqlardır.

Aceba, biz tatarlar bu imtihana haqqıyle hazırlandıqmı? Aceba, biz müslümanlar bu siyasiy imtihandan ğalib ve muzaffer olaraq çıqabilirmiyiz?

Biz, bu hususda kendimize tertib iden vazifeyi yapdıq. İntihabların ne suretle icra idilecegini kerek maqaleler ve kerek ayrı risale şekilinde neşir itdigimiz kitabçelerle añlatmaya çalışdıq. Meclis-i müessisana kimlerin saylanması kerek oldığını da umum Qırım müsliman teşkilâtları vekillerinden murekkeb olub da, ta oktâbr beşinde ictima itmiş Vekiller Syezdi tayin itdi. Bu halda iş yalıñız saylavcıların kendisinde qaldı.

Bugünden itibaren, siyasiy imtihan ve mübarezede müslimanların müstaqilen hareket idecekleri her tatar saylavcısına malümdir. Bu halda bütün müsliman saylavcılarına kendi reylerini yalıñız 9 (doquz) nomerolı namzed cedveline virmek vazifesi qalıyur. Biz saylavcıların kendi reylerini niçin doquz nomerolı cedvele virüb de, diger cedvellere virmemeleriniñ sebeblerini de bir kere degil, bir çoq kereler yazdıq.

Bugün soñ defa olmaq üzere bir kere daha diyurız: vatandaşlar! Eger milletimizin menafini diger menfaatların hepisine tercih biyursañız; milletimizin diger milletlerden aşağı qalmamasını isteyursañız; milletimizin başqa milletlerle her hususda müsaviy olmasını dileyursañız; asırlardan beri mahrumiyetler, zavallılıqlar, huquqsızlıqlar, hürmetsizlikler, tahqirler, haqaretler ve mahkümiyetler içinde qalmış qırımtatarnıñ, yani kendiñizin itibarlı, hürmetli, sayğılı olmañızı arzu idiyursañız reyleriñizi ancaq-ancaq doquz nomerolı cedvele viriñiz!

Tekrar idiyurım, bugünki mübareze şahsiy ve aileviy bir mübareze degildir. Bu mübarezede bizler yekdigerimizle degil, belki başqa milletlerle imtihan tutacağız. Bugünki mübarezede bizim aramızda fırqacılıq olmamalıdır. Vaqtıyle dahi söylendigi kibi, meclis-i müessisan intihablarında umum qırımtatar bir yol ile kitmeli, bir noqtayı hedef-i ittihaz itmeli. Eger bizler bugün reylerimizi 9 nomerolı cedvele virmeyüb da, diger cedvellere virecek olursaq, biz bunıñle müslimanlara zarar, başqa milletlere faide ketirmiş olurız.

Dindaşlar! Eyi düşüniñiz, intihab sandığı başına kidecegiñiz zaman vicdanıñıza müracaat idiñiz. Hangiyi cedvele rey virseñiz, hayırlı iş yapmış olacağıñızı o size söyler. Böyle mübarezelerde şahsiy hoşnudsızlıqlar unudılmalıdır. Zira, şahsiy hislere qapılaraq, başqa fırqalara virilen reyle bizle kendisinden muavin olmadığımız kişileri degil, belki kendilerimizi umum milletimizi mutazarrır itmiş olurız.

Böyle siyasiy mübarezelerde ayrılıq-ğayrılıq olmamalı. Şahsiyet, dost hatırı ve saire aranılmamalıdır. Her saylavcı 9 nomerolı müsliman namzedleri cedveline üç-dört kişi nazarıyle degil, belki umum qırımtatar nazarıyle baqmalıdır. Haqiqatda da böyledir. Zira, namzedlikleri kösterilen kişiler, umum qırımtatar vekilleri tarafından intihab olundıqlarından, onlar bütün qırımtatarnıñ timsal-i mücessemi dimekdirler. Bu suretle reylerimizi onlara virmekle umum Qırım müslimanlarına virmiş olacağız.

Qardaşlar!

Umum Tavrida vilâyetinden meclis-i müessisana hepisi doquz mebus saylanacağı halda, bugün on üç namzed cedveli tertib idilmişdir. Bunlardan her biri öz namzedini, hatta bazıları doquz namzedin, doquzını da kendisi keçirmek isteyur. Kandidat cedvelleriniñ çoqlığı bizim için faidelidir. Zira, reyler bir çoq cedvellere dağılacağı ile müslümanlar birlik olaraq hareket idüb, reylerini hepisi 9 nomerolı namzed cedvelimize verirlerse, her fırqadan ziyade bizim cedvelimiz rey alacağından bizim için qaç mebus çıqarmaq mümkün olacaqdır. Faqat, bizler birlik olub çalışmaz isek, o zaman hiç bir mebus dahi çıqaramayacağımızdan başqa milletler nazarında zerre qadar qıymet ve itibarımız qalmayacağı kibi vatanımız, milletimiz, tarihımız qarşusında da ilâlabed mesul qalacağız.

Can qardaş, qan qardaş!

Vicdanıñı diñle, onıñ virecegi emire inqıyad it! O, saña ne dirse, onı yap! Eger sen her şeyden ziyade vicdanıñnı diñlersen – yañlışmazsıñ. Onıñ virecegi hükümle hareket iderseñ muazzeb olmazsıñ.

Sevgili qardaş!

Eger yigit ecdadıñnın şanle, şerefle yaşatdığı tarihı yeñiden canlandırmaq, yeñiden şereflendirmek isteyursañ; eger parlaq bir maziye, şanlı bir tarih ve ananete malik bir milletin ahfadı oldığıñnı isbat ile onı başqa milletlere de tasdıq itdirmek arzusında iseñ, inqilâb ve hürriyetin saña virdigi haq intihabdan bilerek, istifade it ve reyiñi ancaq 9 (doquz) nomerolı namzedler cedveline vir!