1917.
– № 95. – Noyabr 2.
Arqadaşlar!
Çoqdan
beri kendisinden qorqaraq bahs itdigimiz anarşi artıq bütün manasıyle
memleketde hüküm sürmeye başladı. Petrodrad, Moskva kibi merkeziy, medeniy,
mamur şeherler oralarda baş köstermiş muharebeler yüzünden harabeye dönmek üzere.
Hükümet-i
muvaqqata dağıdıldı. Yerine yeñisi kelmedi ve ne zaman kelecegi de malüm
olamayur. Biz ne hükümet-i muvaqqatanıñ indirilmesine acıyurız, ne de mevqi
iqtidara keçmek sevdasına düşen bolşevikler ve tarafdarlarına teveccüh
köstemiyurız. Bu iki tarafdan her biri kendi hükümetini teşkil itmek ve bu
suretle memleketi idare ile yemek isteyur. Eger bizler iki tarafından biriniñ
hükümet teşkil idüb memleketde baş köstermiş anarşi ve muharebeniñ yeñi
alınmasını ondan bekleyecek ve burada yapılması lâzim kelen iş ve tedbirler
haqqında yine merkezden kelecek emirleri, telimatları bekleyecek olursaq aziz
vatanımız olan Qırımımız dahi anarşiyle, ihtilâller içinde qalacaqdır.
Qaç
kün muqaddem yazdığımız ve bugünki gazetamızın dahiliye qısmındaki haberlerden
dahi añlayacağımız kibi Petrograddan artıq iki dürlü degil, 3-4 dürlü emirler,
hitabnameler, talimatlar kelmekdedir. Bunlardan her biri halq ve milletleri
kendi tarafına davet idiyur. Biz bu emirlere, bu talimatlara baqaraq iş körecek
olursaq bunlar bizi de şaşırtacaq, bizi de dalâletde bıraqacaqdır.
Artıq
hükmi, nüfuzı qalmamış merkezden kelen muhtelif hitabname ve talimatlara
baqılırsa quvetin hangi tarafda oldığı belli olamadığı kibi, mübarezelerden
hangi tarafın ğalib ve hangi tarafın mağlüb olacağı da malüm olamayur. Bizim
fikirimizce qatiy olaraq malüm olan bir şey var ise o da Rusiyeniñ kendisiniñ
mağlüb oldığıdır.
Hükümet,
iqtidar, nüfuz aşıqları varsunlar istedikleri qadar mübareze itsünler,
istedikleri qadar çekişsinler. Hangi taraf ğalib, hangi taraf mağlüb olursa
olsun, bizim bunda başımız yoq. Bir kün kelir, şübhesiz iki tarafdan biri ğalib
olacaqdır.
Faqat,
biz, bugün ne yapalım? Petrograd ve Moskvada patlamış top ateşleri
qığılçımlarınıñ yavaş, yavaş bütün vilâyetlere de sirayet itdigi körüliyur. Bu
qığılçımların düşdigi yerlerde yanğınlar zuhur idiyur. Haneler yanıyur, cemaat
müesseseleri yıqılıyur, yağmakârlıqlar, qırğınlıqlar oluyur, qanlar aqıdılıyur,
basqınlar icra idiliyur. Bu qığılçımlardan biriniñ Qırım yarımadasından uzaq
olmayan Melitopolde dahi düşüb orada büyük yanğınlar, felâketler baş
kösterdigini qaç künden beri oqumaqda, işitmekdeyiz.
Eger
Qırım yarımadasında da böyle bir qığılçımın düşmemesini istersek bu daqiqadan
itibaren qırımtatarından her biri kendisine tertib iden vazifeyi icraya
başlamalıdır. Kerek şeherlerde, kerek uyezd, volost ve qaryelerde sükünetin,
sulh ve asayişın bozulması, nizam ve intizamın ihlâl idilmemesi için
müslimanlar öz aralarından qarağullar, devriyeler,
muhafızlar desteleri teşkil iderek hiç bir yerde süküneti, sulh ve asayiş
bozabilecek bir hareketi ne kendileri yapmalıdır, ne de bunı başqalarınıñ
yapmasına müsaade itmelidir.
Memleketde
gürültü, anarşi ve ihtilâl çıqaranlar umumiyetle cebin qorqaq çeteleridir.
Bunlar kendilerine qarşu ufaq faqat muntazam bir quvet körünce tabana quvet
qaçıyurlar. Eger anarşi çıqarmaq, halq ve haneleri, dükân ve bazarları talamaq
niyetinde olan bedefkârlar, Qırımın her noqtasında muhafız ve qarağul desteleri
mevcud oldığını körürlerse onlar hiç bir işte cesaret idemezler. Hiç bir anarşi
çıqaramazlar. Ve bilâhre kediler alemine düşmiş fareler kibi «ine deligi biñ
altun» diye ya Qırımdan qaçarlar, yaki kendi yuvalarına gizlenirler.
Milletdaşlar!
Köriyursıñız,
ki bütün Rusiye baştan başa anarşi, ihtilâl, ateş, yanğın ve qan içindedir.
Kendisine azaçıq rahatle nedes alınan bir noqta qalmış ise o da ancaq Qırım
yarımadasıdır. Allah itmesün, eger biz bugün hepimize yapılması borc olan işi
yapmazsaq yaki yapılacaq işi tehir idersek Melitopole qadar kelmiş anarşi ateşi
Perekop berzahını (pereşeyka)sını
atlayub Qırıma da kelecek. Vatanımızı ateşler, qanlar, felâketler içinde
bıraqacaq. Annelerimizin, babalarımızın, hemşire ve qardaşlarımızın, çoluq ve
çocuqlarımızın hayatları tehlükeye maruz qalacaq. Taşı toprağı ecdadımızın,
şehidlerimizin qanlarıyle yoğurulmış güzel Qırım, kirli ayaqlarle taptalacaq.
Şanlı dedelerimizin merqadları, mezarları çiñnelecek, eñ muqaddes binalarımız
olan cami ve mescidimiz de belki yıqılacaqdır.
Çünki biz memleketde başsızlıq, anarşi zuhur itdimi,
o bu camidir, bu kelisedir, bu faqır bu zengindir, bu erkek bu qadındır
dimeyur. Holera kibi yaşını, qartını alıyur, yanğın kibi her binayı yaqıyur.
İfrit kibi her yeri taptayur. Şeher ve qasabaları yıqaraq bir harabezara
döndüriyur.
İşte buña meydan virmemek, Qırımda anarşi çıqmasına
imkân bıraqmamaq için bugün ittihaz idilmesi lâzim olan ne kibi tedbirler var
ise haman onlar ittihaz idilmelidir. Qırım Müslimanları Merkeziy İcra Komitesi
resman anarşiye qarşu ilân-i harb itdi. Anarşiyle mübareze itmek için Qırımın
siyasiy merkezi olan Aqmescidde «İnqilâb ve vatanı müdafaa Komitesi» ve
«İnqilâb heyeti» namlarıyle diger milletler teşkilâtları tarafından komiteler
teşkil idilmiş ise de onların hiç biriniñ arqasında bizim kibi can ile
canlanan, bir his ile mütehassis olan qaç yuz biñ kişi olunmadığından ve icab
itdikde hiç birisiniñ arqasında kendisine istinad idilecek sağlam bir quvet
olmadığından Qırım Müslimanları İcra Komitesi Qırımda sulha ve asayiş muhavaza,
hürriyet ve inqilâbı müdafaa için mustaqillen hareket itmeye qarar virerek her
dürli anarşi ve ihtilâle qarşı harb açmış ve dünki künden itibaren işe
başlamışdır.
İhtilâller, anarşiler, başsızlıqlar umumiyetle her
zaman ibtida merkezlerde zuhur itmesi ve soñra etrafa dağılması adet ve tabiiy
oldığından Qırım Müsliman İcra Komitesi başda Aqmescidin muhafazasını düşünerek
bu şeherde sulh ve asayişın muhafazasını Müsliman batalyonına havale itdirmiş
ve bundan başqa da yine şeherin nizam ve intizamı için ayırıca elli kişilik bir
de milliy militsiya teşkil itmişdir. Qırım müslimanları tarafından teşkil
idebilmiş «Vatan ve inqilâbiy anarşiden müdafaa» Komitesine arzu iden diger
milletler sotsialistleri de kirebilirler.
Dindaşlar!
Böyle qarışıq zamanlarda ğayet ihtiyatlı ve
baziretli davranıñız. Bugün her şeyden ziyade sulh ve asayişın bozulmamasına
çalışıñız. Eger bütün Rusiyeyi alt-üst etmekde olan müdhiş anarşiden Qırımı
qurtarabilirsek, bütün manasıyle idariy bir millet oldığımızı dost ve
düşmanlarımıza, yar ve ağyara tanıtmış olacağız...
Evelce dahi defaatle yazdığımız kibi artıq Merkezden
emir ve talimat beklenemez. Çünki bugün Merkeziyet idaresi tamamen yıqılmış,
hükümeti darma-dağın idilmişdir. Artıq umum Merkeziyet iş körecekdir. Sulh ve
asayişı, nizam ve intizamı, hürriyet ve inqilâbiy ancaq, ancaq mahalliy
idareler ve mahalliy teşkilâtlar muhafaza ve müdafaa idebilecekdir. Bunıñ için
Qırımda mevcud bütün müsliman teşkilatlarınıñ Qırımda anarşi çıqmaması için
çalışmaları lâzimdir. Eger biz bügün bu vazifeyi haqqıyle yaparsaq, işin bundan
ötesi kendiliginden hal olunacaqdır...
|