Kendisi oğurında pek çoq senelerden beri mübarezeler idilen, qanlar dökülen meclis-i müessisana intihab künleri keldi. Üç kün soñra intihablara başlanacaqdır.

Faqat bir taqım bedefkârlar saylavcılar arasında soğuqlıq düşürmek için meclis-i müessisan haqqında dürlü, dürlü şayialar neşir itmeye başladılar. Bu şayialarda diniliyur ki «Hepsi bir, meclis-i müessisan açılmayacaq, binaenaleyh saylavların icra idilüb idilmemesinde hiç bir mana yoqdır. Bunıñ için saylavlara iştirak itmemek daha eyidir...».

Qardaşlar! Saqın böyle sözlere ehemmiyet virmeyiñiz. Saqın, böyle bedefkârların neşir itdikleri haberlere qulaq asmayıñız! Saqın böyle teşviqatçıların tuzaqlarına düşmeyiñiz! Biliñiz ki böyle şayialar ancaq iki fena maqsadle neşir idiliyur. Bunlardan biri kendi namzed cedvelindeki kişilerden çoğını saylatmaq için siyasiy fırqalar tarafından yapılmaq ihtimalı vardır. İkincisi ise meclis-i müessisana olan intihabların icrasına mani olaraq bu suretle meclis-i müessisannıñ açılmasını tehire oğratmaqdır, ki bu ancaq bedefkârlar tarafından neşir idiliyur...

Arqadaşlar! Saqın, saylavlara iştirak itmekden imtina itmeyiñiz. Saylav künlerinde her iş ve küçiñizden vaz keçerek milliy ve medeniy borcıñızı ifa idiñiz. Sizler: meclis-i müessisan açılacaqmı, açılmayacaqmı, diye intihablara soğuqlıq köstermeyiñiz. Haq intihaba malik olanlardan her biriñiz saylav künlerinde reyleriñizi virmeye hemde ancaq 9 nomerolı cedvele virmeye çalışıñız. Bu sizin hepiñizin milliy bir borcıñızdır, medeniy ve vataniy bir vazifeñizdir.

Milletdaşlar!

Bugün Rusiyede hüküm sürmekde olan anarşiye, ihtilâle, qanlı hadiselere baqub da meclis-i müessisan intihablarına qoşulmaqdan keri durmayıñız. Bütün Rusiye anarşi içinde qalsa, bütün Rusiye al qanlara boyansa, bütün Rusiye ateşlere yansa bile yine meclis-i müessisan saylavlarına iştirak itmek lâzimdir. Zira, evelce dahi qaç defa yazdığımız kibi meclis-i müessisan intihabları bizim için her şeyden ziyade başda siyasiy bir imtihanlar. Bizim hayat-ı siyasiyede işğal idebilecek oldığımız mevqin derecesi bu siyasiy imtihan ile ölçelecekdir. Eger bu imtihanı haqqıyle tutarsaq mevqimiz yükselecek ve diger fırqalar ve milletler nazarında prestijimiz artacaqdır.

Dindaşlar!

İnqilâb ve hürriyetin bize virdigi intihab haqqı eñ muqaddes haqlardan biridir. Bu haqqımızdan istifade itmek lâzim. «Adam sende bir reyin virilüb virilmemesinde ne ehemmiyet olabilir?» dimeyiñiz. Bir reyin pek büyük ehemmiyeti vardır. Yuzler, biñler, millionlar hep o ayırı, ayırı birlerden teşkil idiyur...

Şunı unutmayıñız, ki virecek reyleriñizi «Ben reyimi virmeye borclıyım, bunıñ için viriyurım», taşınmadan virmeyiñiz. İntihab tezkereleri, rey puslaları kendisine bıraqılan sandığın başına varmadan niçin, ne maqsadle rey virecegiñizi düşüniñiz. Eger sizlerin taqib itdigiñiz bir emel, bir arzu, bir dilek varsa bunları meydana kimler ketirebilecegine vicdanıñız qanaat iderse reyleriñizi ancaq onlara viriñiz. Bu cehetleri düşünürseñiz, milliy ve siyasiy emelleriñizin kimler tarafından vücuda ketirilebilecegini sizlere vicdanlarıñız söyler. Vicdanlarıñızın sizlere kösterecegi kişiler ise, şübhesiz 9 nomerolı cedvelde isimleri kösterilmiş kişiler olacaqdır.

Vatandaşlar!

Bugün muqaddes vatanımız, haq reye malik bütün evlâdından kendilerine tertib iden vazifeniñ haqqıyle icrasını talab idiyur. Bu vazifeniñ icrasında qusur idenler, yahud bu vazifeyi icra itmekden tamamen imtina idenler vatan, millet ve tarihımız qarşusında mesul olacaqdır. Eger sizler hepiñiz bu muqaddes vatanıñ haqiqiy evlâdı iseñiz, eger sizlerden hepiñiz bu mübarek vatanı kendi anañız tanıyursañız bugün o vatanıñ sizden talab itdigi vazifeyi icra itmekden imtina itmeyiñiz.

9 nomerolı cedvelimizin rey tezkireleri Qırımda mevcud bütün uyezd, şeher, ve volost komitelerine könderilmişdir. Saylav künleri saylav olacaq mahallere vardıqda sorıñız, isteyiñiz, sizlere virirler. Başqa nomerolı rey tezkirelerini almayıñız. Alsañız da onları sandığa bıraqmayıñız.

Arqadaşlar!

Dünki maqalemizde dahi yazdığımız kibi siyasiy fırqalardan «Narodnıy sotsialist» fırqası, müsliman saylavcılardan rey almaq için pek tatlı sözlerle, pek tatlı vadlarle tatarca olaraq Qırımın her tarafına hitabnameler dağıtmışdır. Mezkür fırqa kendi cedveliniñ doquzıncı sırasında Hurşid bek Qrımtayevın namzedligini de qoyaraq bunıñ ile müslimanları kendisine celb itmek ve müslimanların reylerini almaq isteyur. Qardaşlar, saqınıñız! Öyle hitabnamelere, öyle yaldızlı sözlere aldanmayıñız. Reyleriñizi yalıñız 9 nomerolı müsliman cedveline viriñiz.

Ben tekrar olaraq söyleyurım: eger umum Qırım müslimanlarınıñ bugün beslemekde oldıqları milliy ve siyasiy emellerin tezlikle husula kelmesini isterseñiz, vicdanlarıñıza muracaat idiñiz. Vicdanlarıñız sizlere hangi nomerolı namzed cedveline rey virecegiñizi söyler. Bu halda vicdanıñızın hüküminden başqasını tanımayıñız. Vicdanlarıñızın hükümine qarşı kitmeyiñiz...