Biz bu saylavı müslimanlar için birinci siyasiy bir imtihan add idiyurız. Bağçasaray cemiyetleriniñ bir buçuq aydan beri intihablarda olan ciddiy hazırlıqlarına baqılırsa, Bağçasaray müslimanlarınıñ bu siyasiy imtihan muvaffaqiyetle tutacaqları añlaşılıyur.

Glasnıy cedveli tertibinde bağçasaraylılar arasında bazı ihtilâflar çıqaran üç cedvel tertib idilmiş ise de, biz kine Bağçasaray müslimanlarınıñ yalıñız imtihanı muvaffaqiyetle tutabilmek için ğayet diqqat ve ihtiyatle hareket iderek sayılanacaq otuz glasnıyden 23-24-diniñ kendilerinden keçirebileceklerine inanıyurız.

Bu azaları nasıl adamlardan sayılanılacağını bağçasaraylılar tabiiy, bizden daha eyi düşünmişlerdir. Şeher idaresine intihab idilecek kişilerin her şeyden muqaddem keçmişde yapdıqları işlerine baqılmalıdır. Eger intihab olunacaqlar eski devirde bile kendi menfaatlarından ziyade halq menfaatını düşünmiş, milletin huquqını müdafaa itmiş, milletden uzaq bulunmamış, her zaman halq ve milletle beraber kitmiş, milletin felâketine iştirak itmiş adamlardan olursa bağçasaraylılar mezkür imtihanı pek güzel tutmış olacaqlardır.

Bağçasaray umum Qırım müslimanlarınıñ tarihiy bir merkezleri oldığı için bu şehere her hususında diger müsliman şeherlerine nümüne olaraq bir rehniñ virilmesi bugün her tatarın bir arzusıdır. Oña böyle bir rehinñı virecek o şeheri imar ve ihya idecek, onı milliy asar-ı medeniyemizle, tezyinı ile canlandıracaq nezafet ve intizamiyene çalışacaq ancaq, belediye idaresi olacaqdır. Eger belediye idaresine milletini seven namus-ı milliyimizi yükseltmek isteyen şeherin bütün manasıyle medeniy ve mamur bir şeher halına qonılmasını cidden arzu iden becerikli, namuslı, işgüzar, faal adamlar saylanırsa 3-5 sene soñra Bağçasaray şeheriniñ bambaşqa bir hala kelecegine hiç şübhe yoqdır.

Bunıñ için biz diyurız ki, yarınki kün bağçasaraylıların siyasiy imtihan künleridir. Eger bağçasaraylı qardaşlarımız bu imtihanı lâzim oldığı kibi tutarlarsa, hayat-ı siyasiye ve ictimaiyeniñ qapusında muvaffaqiyetle kirdiklerini köstermiş olacaqlardır.

Bağçasaraylı qardaşlarımızın bu siyasiy imtihanı büyük muvaffaqiyetle tutmalarını temenni ideriz.