1919. – № 19. – Yanvar 23.

Bu soñ zamanlar Şuma ve çevresinde bir talay hırsızlar türemege  başlağan ediler. Bunlar bir çoqlarınıñ evlerini basa, yaki yoldan izden kitkenlerge sataşa ediler. Yanvarnıñ beşinci küni kicesi bunlardan bir partiya Şumada Bilâl bekniñ evine varğanlar. Lâkin ev sahibleri duyğan, hırsızşarnı qaçırğan. İkinci cemaat Şuma cemaatlardan olub bu işde ilişigi olğan Nafi Dervişni tutqanlar. Zorlab arqadaşlarını aytdırğanlar. Bunlarnıñ içinde keçenlerde Aqmescidde tutulğan aytuvlı hırsızlardan İbriş de var eken. Ve kendileriniñ yaqında Şumanı basacaqlarını söylegen bunıñ üzerine Şuma cemaatları yuz qadar qaravul çıqarub kice köyni sarğanlar. Ve sabahleyin hırsızlardan ikisini tutub ketire ekenler. Hırsızlar bir qaç kereler qaçmağa ıntılğanlar. Cemaat onlarnı tutqan. Lâkin eñ soñ defa qaçqanda atmağa mecbur olğanlar. İkisi de ölgen. Bu hırsızlarnıñ çoğısı tatar eken.