Aqmescidniñ her mahallesinde, hatta her şesinde degenday bir orus kitabhanesi tapıla. Satın almağa vaqtı olmağanlar bu kitabhanelerge kite, oturub oqıy, yaki ayda berecekleri biraz para qarşılığında kitab alıb faydalana soñ kene qaytaralar. Bu kitabhanelerde gazet, jurnal ve zaman-zaman çıqqan broşüralar da tapıla. Halqlar onlardan dünyada neler olub keçkenini ögrene, bildi ve oquv dünyasında olayatqan şiylerni köreler. Halbuki bu qadar tatar halqları olğan bu Aqmescidde bir dane tatar kitaphanesi yoq.

Zavallı tatar ocaları, oquyıcıları özlerine kerek ve bilgilerini artdıracaq day kitablarnı tapalmay, yanıb-yaqılıb cüreler. Her kitabnı satın almağa vaqtları da yoq, orus tilinden de o qadar faydalanıb olamaylar. Fuqare halq da şay.

Her yaqda eksikligimiz olmaqle beraber bu yoldaki eksikligimiz her şiyden üstün. İşte halqımıznıñ bu hususdaki acınıqlı halını közge alğan ve tatarnıñ tek bilgi, yükselüv ve işleklik işlerimen oğraşmaqnı boyunına alğan Aqmescid tatar klubı yahşı, usullı bir kitabhane yasamağa qarar berdi.  Lâkin bugün orta derecede bir kitabhane tiziştirmek bir çoq biñ rublelerge baylı bir iş. Bunı ise klubnıñ öz başına  başarması mümkün dügül.

Bunıñçün tatar klubı bütün Aqmescid şeheri ve başqa yaq misliman, hristian bütün yurtdaşlarımızğa baş urub tatar klubında yasalacaq kitabhane içün kitab bağışlamalarını yalvara. Tış şeherlerde olub da tatar klubınıñ bu yüksek tilegine kitab ve yaki paranen yardım etmek istegenler aşağıda kösterilgen adreske haber virmeleri rica oluna.

Aqmescid şeheri içün tatar klubu yañı hesable bu martnıñ 28-ncı cuma küni bir "kitab küni” yasamağa qarar verdi. Bugün klub tarafından ellerinde şehadetnameler ve verilgen kitablarnen, yapılğan yardımlarnıñ adlarını ve kimniñ tarafından verilgenini yazmaq içün cedveller olğan efendiler ev evden dolaşaraq kitab toplayacaqlardır.

Bu işdeki büyük muqaddesni añlağan kişilerniñ onlarnı qaytarmayacaqlarını ümüt etemiz. Bu yolda yapılacaq eñ küçük bir yardım milletimizniñ añlav ve bilüv yaşavına pek büyük tesirler yapacaqdır ve cahil milletimizniñ açıluv ve añlav yapusına bir temel taş qoyacaqdır.