Yalta ile Aluşta arasında bir köy vardır. Adına Büyük Lanbat derler. Qara deñizniñ qaşısında yüksek güzel bir yerde bulunur. (250) hanelidir. Hep tatarlıqdır. Eger bu köyniñ halqları çalışqan olsa, bugün bu köy cennetke oşacaq edi. Lâkin onlar toylardan, içkiden, kâgıd ve domino oyunından qurtulub olamaylar. Bütün köyni şay desek doğrı olmaz. Lâkin çoğısı böyle içlerinde yahşıca kişiler var. Bazı yapqan işleri de körüle, amma, göñül rahat etecek qadar dügül. Bir zemstvo mektebi ve iki de yahşı tatar ocaları var. Lâkin tatar ocaları içün oqutacaq mektebler yoq. Çalaş kibi mekteblerini andan anda köçürüb yüreler. Şindilik bu ocalardan birisi eskiden qave olğan bir binada, bir danesi de bir tükânda oqutalar. Qaveniñ mektebke çevirilmesi yahşı. Amma qave yapusı mekteb binası olamaz. Eger şindi halqlar cemaat aqçalarını başqa yaqlarğa sarf eteceklerine bu qave ve tükân binaları yerine yahşı bir mekteb saldırsalar, örnek olacaqday bir iş yapmış olacaqlar. Lambatlılarnıñ şindilik eñ yetişmegen şiylerinden birisi de imamsızlıqlarıdır. İmam arabça "اوك” demekdir. Yani imam ögini, ilerini kösterir. Eger bu köyde imam olmasa, ögine kitecek yeri yoq demekdir. O halda onıñ işi artına qaytmaqdır. Bizde imamlarnıñ hepisi ögini köstermiy amma, nasıl da olsa yahşıca bir imam tapmaq kene mümkün olur edi. Lâkin Lanbat cemaatı bunıñ içün pek az çalışalar. Rahmetli Hacı-Osman efendi vefat etkenden soñ bu köy pek söngendir. Köyniñ eñ yaramağan yaqlarından birisi de oyunnıñ çoq olmasıdır. Eñ çoq oynanğan oyunlar da domino ve kâğıd oyunlarıdır. Bütün cemaat, oynağanlar bile bundan şikâyet eteler. Lâkin hiç birisiniñ aqılına kelmez ki, el birliginen bunı qaldırsınlar.

Bu köyde balabanca baylarımızdan Hamid efendi aqay vardır. O keçen qalabalıqlarda bayağı qırpalandı. Lâkin nasıl da olsa, öz köyi içün yahşı bir mekteb yasatıb verecek qadar küç ve taqatı vardır. Lâkin bütün baylarımızda olğanı kibi, onda da oquvnı sevmemek fuqareligi olsa bilmem!..