1917. – № 115. – Noyabr 27.

      Dün idarehaneye kelen Şimaliy qardaşlarımız matbuatından "Yeni vaqıt” ile "Turmuş”da köze çarpacaq kibi, ayırı yazılarle yazılmış ilânı dünki nüshamızda derc itmişdik. 

    Mezkür ilândan añlaşıldığına köre, Şimaliy ve Sibiryalı qardaşlarımız milliy, medeniy muhtariyet-i esası qurmaq için milliy qurultaylarınıñ 17-nci noyabrde çağırılmasını taht qarara almışlar. İşe kirmişler. Ayn zamanda milliy duyğuların canlandığı, yukseldigi böyle milliy ve tarihiy bir künden istifade itmeniñ yolını düşünmişler, milliy hazineye para toplamağa teşebbüs itmişler. Bu teşebbüs, pek maqul ve pek musib bir teşebbüsdir. Millet, sermaye-i maneviye, efkâr-i münevereye muhtac oldığı kibi sermaye-i maddiye, naqud-ı mevcudeye muhtacdır. Bunıñ her ikisi de olmayınca milliy işler köçemez. Bunıñ için Qırım qırımtatarıda muqadderatını öz eline aldığı tarihiy bir künde iane idekeldigi millet sanduğını unutmayacaqlarına ve belki evelkinden daha ziyade himmet ideceklerine qoyan ümid, arz.

    Bugün açılan Qırım milliy Qurultayı tatarın ve tatarın mülkiniñ siyasiy, milliy işleriniñ yeñiden doğmasına hıdmet idecek esasları vaz idecekdir ki, bu qırımtatarnıñ tarihiy bir küni, milliy bir bayramı sayılacaqdır.

    Şeherliler, köyliler bu bayramı şübhesiz şadlıqla icra iderek, biri-birlerini tebrike şitab ideceklerdir.

    Nice yıllardan beri esaret zıncırlarıyle bağlanan millet bugün o zıncırları qırdı, halâs oldı. Ğasb olunan huquq ve muqaddesatını da öz necib eline almaya qarar virdi, işe başladı.

    Bugün qurulacaq milliy Qurultay milletin eñ aziz bir meclis ve bu meclise intihab olunan, kelen mebuslar da milletin eñ mühterem kişileridir.

    O aziz meclis, bütün anananet-i tarihiyemizin timsal-i mücessemi olan Bağçasarayda, Hansarayda açılacaq müzakereler, işler şeher upravası zalında olacaqdır.

    Bağçasaray, bu suretle evelki tarihiy rolni yine alacaq, milletin siyasiy, milliy işleriçin merkezi ittihaz idelecekdir.

    Bu, pek musib bir fikirdir. Çünki bir tarafdan şeherin ehemmiyet-i tarihiyesi, diger tarafdan ise qırımtatarına merkez olmaq münasebetiyle şeherin kendisi de tatar halqından ibaret bulunması bu fikirin isabetine delili qaviy olabileyur.

    Qurultay natıq-ı iftitahı ile açılacaq, şekl-i idare ve sair siyasiy, milliy meseleler için hazırlanan lâihalar oqunacaq, müzakereler idilecekdir.

    Qurultayda müzakere idilen meseleler, virilen qararlar "Millet”de derc idilerek, millete arz olunacaqdır.

    Qurultayda baqılacaq meseleler milletin hayatiy meseleleri oldığından, millet buña ne qadar ehemmiyet virse, yeri vardır.

    Zaten millet, milliy siyasiy meselelerine büyük bir ehemmiyet virdigini inqilâbdan beri kösterdigi qatiy hareketleriyle, milliy ictimaileriyle isbat itmişdir. Bunda yine azm ve sebat kösterecek, hedef amale varub ireşecekdir.

    Şurasını zikr itmeden keçemeyecegiz ki, milletin muqadderatını eline alaraq, aña saadet bahş idecek esbab-i tehiye itmeyi derahde iden mühterem mebuslarımız saadet-i milliye oğurında atacaqları qatiy adımları tereddüdsız atmalıdırlar. Kendilerini intihab iden, könderen miletin arzusı, talabı da budır.

    Soñ sözimiz, şanlı, şerefli bir maziye malik olan türk-tatar qavm-ı necibniñ taraf-taraf vücuda ketirdikleri milliy qurultaylarından saadetler doğacağına iman iderek, añlara candan selâm ve selâmetle tebrik ve tehniyet irsâl ider, işlerinde muvaffaqiyetler körmelerini temenni eyleriz.