1919. — № 6. — Yanvar 8.

Şimdiye qadar "Haqiqiy hakimiyete doğrı” serlevhası altında "Millet bankası”na dair yazdıqlarımızın mabadını devama başlayurız. Aradaki fasılaya sebeb, banka nizamnamesi tasdıqnıñ bu [ana degin] keçikdigindir. Bir çoq küçüklikden, bir hayil intizardan soñra nizamnameniñ tasdıq idildigini işitdik. Buña da (şükürler olsun!) diyeyerek faaliyete keçdik.

Faaliyetimiz ilk sathasını Aqmescid ileri kelenleri, varlıqlıları ile istişareye hasr itdik. Bu mühim ve ciddiy işde birlikle, varlıqla çalışmalarını onlardan istirham itdik. Bunıñ için de kendilerine ayırı-ayırı davetnameler köndererek, yanvar dördünci küni aqşamı saat altı raddelerinde [durangi] 8-de (bankanıñ bulundığı Trevalgolnıñ[1] binasında) bu hasır sade bir meşveret olacağını bildirdik ise de, davetlilerin bulundıqları yerler merkeze uzaq olmasından dolayı bu qorqunç vaqıtlarda aqşamdan soñra o yerlerde yaşayanlar için soqağa çıqmaq ehemmiyet virilecek bir tehlüke sayıldığından davete pek az icabet idilebildi. Kelenlerin teklifleri izerine yanvarin yedinci Salı küni sabahleyin alafranğa saat on birde ictima idilmek üzere davetnameler könderilmesine qarar virildi. Qarar mücibince davetnamelerde könderildi.

Prazdnik münasebetiyle her taraf qapalı olacağı bir künde muhterem davetlilerimiz ihmalcılıq itmeyüb davet olunan yere vaqtında keleceklerine şübhe itmeyiz.

Çünki bu mesele siyasiy-idariy bir mesele degil, davetlilerle beraber umum milletin menfaatına taliq iden iqtisadiy bir meseledir. Siyaset milleti biri-birinden uzaqlaşdırırsa, iqtisad onları bilaksi biri-birine yaqınlaşdıracaq, birleşdirecekdir.

Milliy idareniñ bunda siyaset ve idare noqta-i nazarından hiç bir kirişikligi olmayacaqdır. Bu muessise başlı başına bir halq muessesesi, muessese-i itibariyesi olacaq qalacaqdır. Bunıñ idaresi ancaq hisse-i senedlerini satın alaraq ortaqlığa kirenlerin elinde bulunacaqdır.

Milliy idareniñ bu muesseseye taliqı şimdiye qadar müteşebbüslik saffetiyle çalışması bir, ikincisi de onıñ meydana kelmesi için maddeten yardım itmesidir. Şayed millet efradı kibi kendi de bankanıñ hisse-i senedlerini öz parasına alırsa, o da hissedarlar arasına kirecek, o da idelen kârdan hissesine köre bir pay alacaqdır. Bu zikr itdiklerimiz bankanıñ nizamnamesinden de açıq bir suretde añlaşılacaqdır. Onıñ için burada şübhe iras idecek hiç bir şey yoqdır ve olamaz da.

Banka meselesi, hususıyle "millet bankası” meselesi bizim için yarına bıraqılacaq meselelerden degildir. Bunı eñ evel başlanacaq milliy, nefiy işlerimizin başına keçirsek, qoysaq yeri vardır.

Bu muessese milletin elinde semeresiz, faidesiz qalan sermayeleri alub milletin, ağyarın emin tuccarlarına, şirketlerine, kooperativlerine, çalışqan namuslı sanatkârlarına, köylülerine virerek semer sayılacağına zerre qadar şübhemiz yoqdır. Haydı baqalım, ğayret halqdan ise tevfiq halqdandır.

[1] Metinde: تروولغولنیك