Nikâh merasimi

Qırımtatarlarda eki türlü nişan ola. Birinci nişanğa "sözkesim” ya da "yengil nişan”, deyler. Oğlan bala qıznı saylağan soñ, özüni eñ yaqın tuvğanlarını (qudalarnı) baş qudanen beraber qıznıñ evine yollay.

Qıznıñ qorantası musafirlerni evge kirseteler ve qudalarğa sofra donatalar, amma olarnı kelgen sebebini bilmegenday köstereler. Sofranı donatqan soñ endi musafirler nasıl maqsadnen kelgenini sorap başlaylar. Baş quda bu sözlerni atmaq kerek:

Biz sizge yahşı bir niyetnen keldik. Bizim evlenecek oğulımız bar. Biz siznen yaqın adamlar, tuvğan olmağa isteymiz. Siziñ üç balañız bar — barsıñ bizim oğlumız dörtünci olsun. Siziñ qızıñız ise bizim qızımız olsun. Yaşlar biri-birini seve, Alla öyle nasip eylegendir daa. Olarnı evlendirsek, Allanıñ ögünde yahşı bir iş yapqandan olurmız. Buña siziñ razılığıñızı isteymiz.

Qıznıñ babası razı olsa da, birden razı olğanını aytmay ve: bizge tevsiye etmek kerek, dep ayta. Soñ razılıq bere. Qudalar alıp kelgen boğçanı açalar. Bu boğçada dört parça şey olmaq kerek. Başta qart adam boğçanı açqanda, boğça üstünde bir testmal ala. Bu testmalnı "qadın” oquğan qartanayğa bereler. Boğçada yurtqa qoyulğan yavluq da ola. Bu yavluqnı qart kişige bereler, şu qart adam yurtqa qadın oqumaq kerek.

Qudalar boğçanı kelinge qaldıralar. Ve kelin tarafından kiyevge de bir boğça bereler. Bu vaqıtta qudalar "ağır nişannı” vaqtını, kününi, ne vaqıt olacağını aytalar. Bu vaqıttan soñ qız bala tek bu oğlannı qızı olup sayıla. Qıznen oğlannı "nişanlı”, dep saymaq mümkün.

Bir qaç aydan soñ nişan toyu ola. Ağır nişanğa eki taraf azırlanalar. Kiyevni, kelinni evlerine musafirler çağırıla, aş pişirile. Tuvğanları nişan olacağını eşitken soñ "közaydın” aytmağa keleler. Ağır nişan olğan künü kiyev tarafından kelinge nişan boğçası ve kiyev tabağı yollana. Nişan boğçası birinci boğçağa köre pek büyük ola. Mında kelinge, kelinniñ eñ yaqın tuvğanlarına bağşış qoyula. Kiyev tabağında çeşit türlü konfet, qurabiye ve kiyev sigareti ola. Kelinni evinde episi toplaşıp, boğçanı açalar. Qudalarğa sofra donatalar ve qudalar endi kelin ve kiyev tarafında toy olacaq kününi aytalar. Mında qudalar olacaq toy aqqında laf eteler.

Kelin taraftan ana-babası kiyevge de boğça yollaylar. Bu boğçada: kiyev çamaşırı (doquz parça şeyden ibaret), yüzbez, havlı — babasına, mahrama — anasına.