Qırım müslümanları tarafından Millet Meclisine vekil bulunacaq Abdureşit Mehdiyev – Orludır. Aqmescitte rus darülmuallimin mektebinde ikmal-i tahsil ittikten soñra, bir qaç seneler rusçaya muallim olup: keçen sene Qarasu şehrinde Upravaya aza saylanmış idi. İlim ve bilgiye sevqıtabiy olduğından ikmal-i tahsilden soñra yan kelmiyüp, ğaflet itmeyüp daha ve daha oqumaya, mütalâaya verilüp, bir çoq kitap aqtarmış, faal çalışqır, 26 yaşında bulunan bir yigittir. Rus lisanına güzel aşna olduğından, bundan nice seneler muqaddem gazetlerde ve bahusus «Kaspiy» gazetasında maqaleleri korülmekte edi. Her ne qadar lisan ve edebiyat-ı-türkiyde malümatı az ise de, zahmet ve müşküllâttan qorqmayüp, keçen seneden beri Qarasuda «Vetan Hadimi» gazetasını çıqarmaqta bulunmuştır. Faqır bir aileden yetişüp, ğayet mahdut ve kâfi olmayan şkola tahsilinden soñra Mehdiyevin kesb-i-malümat, kesb-i-memuriyet, kesb-i-rağbet ittigi – yalıñız öz istidatı iledir. Özünden daha ziyade tahsil körenlere – ibret, daha az tahsil körenlere – numune-i-imtisaldır . Bu defa "millet vekili” olmaq ile bütün Rusiyeniñ müteberane mebusı payesine köterildi. Böylece, öz-özünden, datı ve emcesiniñ «qoltuq tayağı»sız ilerileyenler, haqiqaten, – lâyıq-ı-hürmettedirler /hürmetke lâyıqtırlar/. Abdurreşit Mehdiyev meslek cihetinden bizi bellisiz bir birligi ile ürkütüyor idi. Bazı malümatlara bazanaraq, biz bu refiğimizi ziyade sol taraflı biliyor idik. Bu defa Aqmescitte bizzat özünden ve yaqın bilicilerden añladağımıza köre, «İttifaq-ı-Müslimin» programına muhip ve milletçi olduğına qani olaraq, şimdiye qadar haq-qında besledigimiz hoş ümütleri daha ziyade ilerlettik. Böyle açıq ve hayırlı olsun! «Selâmetlik bar» – diyecegim yoqtur, ancaq, ey qardaş ve qardaşlar, unutulmasın ki, bugünde milletimiz himaye ve muavenete eñ ziyade muhtac olan bir millettir. Yaşlar ve muallimler, sizleri de tebrik ideriz, civan Mehdiyev sizler içün şereftir!