Soyadlar bazası |
"Tamırlarıñnı ögren"
Aqmescit Devlet Arşivinde
|
|
|
|
T. Kerim: 1917–1920 seneleri «Millet» gazetasında basılğan ilmiy-tenqidiy ve içtimaiy-siyasiy eserleri
Metin
tili: qırımtatarca
Müellif:
Tahir
Nureddin oğlu Kerim
Hürmetli oquyıcı, Qırımnıñ
medeniy müesseselerini ziyaret etüv esnasında zamanımızğa qadar
saqlanılıp kelingen milliy yadikârlıqlar üzerinde malümat
toplamaqnen qanaatlenmeyip, biz meraqlanğan eski elyazmalarnı ve
basılğan ceryanlarnı terence ögrenmege lâyıq kördik.
Bağçasaray, Aqmescit şeherleriniñ merkeziy müzey ve
kütüphanelerini esasqa alıp, mında olğan kitaplarnıñ bir
payını cedvelge aldıq. Hususan, Aqmescit Devlet arhiviniñ
fondlarını araştırır ekenmiz, 1944 senesine qadar Qırımda
neşirden çıqqan böyle milliy gazeta ve mecmualarğa rastkeldik:
"Terciman”, "Millet”
(muharrir İ. Gaspralı), "Millet” (esaslı olaraq S. Ayvazov),
"Golos tatar” (İ. Özenbaşlı), "Krım”,
"Qırım ocağı” (A. Arif),
"Yeñi dünya” (M. Nedim),
"Qırım müsülmanları”,
"Yaş quvvet” (Seydametov),
"Köz aydın”,
"Azat Qırım”,
"Qızıl Qırım” (İ. Seyfullayev),
"Golos Krıma” ve ilh.
Mezkür arhivde olğan bütün rusça
ve qırımtatarca neşirler cedvelini 2008 senesi Qırım mühendislik
ve pedagogika üniversitetine baqqan "Elyazma kitaplar” degen
İlmiy araştırma Merkeziniñ Bülleteninde bastıq.
Bugünge qadar nüshaları eñ çoq
saqlanğan "Millet” gazetası diqqatımıznı ayırıca celp
etti. Bu kâğıtı orta keyfiyetli ve 34×50 santimetr çerçevesinden
tış çıqmağan cuma ve bayram künlerinden başqa her kün neşir
etilgen gazetadır. İlk sahifesinde muharrirniñ baş maqalesi
yanında medeniy müesseseleriniñ
açılması, intihaplar, teatrlerde kösterilmekte olğan pyesalar ve
yañı kinofilimlerniñ nümayışleri haqqında haberler berilir
ise, nevbetteki eki sahifede mahalliy ve tış memleketlerde olğan
siyasiy, iqtisadiy, içtimaiy ve medeniy meseleler aydınlanır.
Arada-sırada basılğan yazıcılarnıñ manzum ve nesir eserleri
gazetanıñ bediy
qurulışına hususiy ahenk qoşalar. Soñkisi ise bütünley
ticariyet haqqındaki ilânlar ve bildirüvlerden ibaret. Umer Sami
1924 senesi "İleri” mecmuasında basqan "Qırımda tatar
matbaacılığı” adlı maqalesinde qırımtatar milliy neşirlerini
tahlil etip "Millet”in tışdan körünişi ve tertibi Qırım
mıqyasında alırsaq, bugün için bile pek güzel ve mükemmel,
diyebiliriz. Mündericatına kelince, o da vaqtın-vuquatın hükmine
köre, çeşidli. Zengin ve hararetlidir”,
aytqanı kibi, biz de gazetanı üstten bile oqup çıqqanda "Qırım
haberleri”, "Dahiliye”, "Hariciye”, «Muharebe», «Milliy
matbuat» ve başqa rubrikalarda keçmiş devirine ait yañı tarihiy
delil ve simalarnen tanış olamız. Ancaq, öz eserlerinen halq
ögünde çıqqan H. Ayvazov, C. Kermençikli, M. Refatov, O.
Zekki, M. Nuzhet, M.
Qurti, A. Qadrizade, C. Seydahmet, O. Aqçoqraqlı, H. Odabaş, Yu.
Vezirov, H. Cahit, E. Feyzi, H. Kürkçi, A. Şeyhi, A.
Abdülhamid, B. Qabacan ve ilh. istidatlı yazıcılar içün bu
gazeta qocaman bir icadiy meydan olaraq tasvirlene edi. Qalemni
mahirliknen oynatqan H. Odabaşnı alayıq. O, reportaj,
felyeton, retsenziya ve bir sıra gazetacılıq janrlarnıñ yanında
ertege, büyük ertege, küçükçe ertege, ertege tügül,
tekerleme, çıbırtma, kezinti kibi özgün, türkiy halqlarğa has
olğan janr türlerini muvaffaqiyetnen qullanıp, qırımtatar
matbuat tarihında milliy añaneleriniñ devamlayıcısı adınen
qalmaq haqqını qazanğandır. O vaqıt qırımtatar gazetalarında
az qullanılğan janrlar vastası ile yazıcı ve maarif ustası
usanmadan halqını ilim-fenni, milliy tilini sevmege, qorumağa
çagırır.
Yuqarıda añılğan adlarnıñ
sırasına daha mahlâslar ve kriptonimlerni qoşmaq mümkün. Bular:
Amele; Tatar oğlu; Haberci; Eski Qırımlı;
Qızıltaşlı;
Çatırtavlı;
Qırımlı;
Soldat;
Çürti; Romaniyalı Baybörü; Çezmen; M.R.;
S., H.S., H.S.A.;
M.Q., MıQ;
İ.V.; T.İ.; H., H.O.
ve ilh. "Millet” gazetasında basılğan müellif isimlerniñ
şekil variantları da meraqlı: Müfti Çelebicihan = Çelebi Noman
= N. Çelebicihan = Çelebicihan; Ayvazov Hasan-Sabri = H. Sabri
Ayvazov = Sabri Ayvazov = Ayvazov S. = H. Sabri; Hafız Osman Murasov
= O. Murasov; A. Qadrizade = A. Rehmi Qadrizade; Osman Nuri
Aqçoqraqlı = O. Aqçoqraqlı = Soldat: O. Aqçoqraqlı = Osman
Aqçoqraqlı; Timurcan Odabaş = H. Odabaş; Mustafa Qurtiy = Mustafa
Qurtiyev; Umer Necatiy Seydahmedov = Necatiy Seydahmedov = U. Necatiy
Seydahmedov ve ilh.
Böyleliknen, "Millet”
gazetasında qullanılğan isim konstruktsiyaları müellifniñ
harakterini, tercime-i halını, mefküreviy baqışlarını, zenaat
ve qaysı bir cemiyet tabaqasına mensüpligini açıqlayabileler.
Velhasıl, bu ilk baqıştan sade, önemsiz kibi körüngen ufaq
detaller "Millet” gazetasında basılğan şübheli müelliflerniñ
identifikatsiyasına büyük hızmet etmek mümkün.
Gazetanıñ resmiy tilini de alayaıq.
Mında bazı yazıcılar öz eserlerinde arapça ve farsice sözlernen
yoğurlaşqan İstanbul, bazıları ise Qırım çöl lehçesini
açıqtan açıq teşviqat yapqanlarını seyir etemiz. Bu meseleğe
ciddiy yanaşqan
alimler B. Çobanzade, H. Giraybay, A. Krımskiy, A. Samoyloviçniñ
fikirine köre, qırımtatar tili üzerinde peydalanğan
qarmaqarışıqlar ziyalılarnıñ "Türklük” ve "Tatarlıq”
ğayeviy cemiyetlerine bölüngenlerinden ibaret.
Birisi İstanbul lehçesine nail olursa, ekincisi Qırğız, Qazah,
İdil-Ural türklerini birleştirip, yekâne Şimaliy til pıtağını
meydanğa ketirilmesi üstünde tüşüne edi. Lâkin, tarih köstere
ki, bularnıñ yolları ayrı olsa bile, maqsatları bir: bütün
türkiy halqlarını birleştirmektir. Şahsen, "Millet”
stünlarında aydınlanğan til yonelişleriniñ eñ ateşin
raqipleri Habibulla Odabaş ve Cemil Kermençikli olsa, aralarından
devamlı qavğanıñ ardını kesmek niyetinen "Türk lisanınıñ
türlü lehçelerinde bulınan muhtelif lüğavilerle (çeşit
leksikalarnen) Türk lisanını zenginleştirmekdir”, – diye
ortağa çıqqanlar da bar.
Mevzumıznı devam eterek, qırımtatar
matbuat tarihınıñ ögrenilmesine S. Ğafar, İ. Kerim, N.
Abdülvaap, G. Yüksel, L. Selim, E. Kangiyeva, H. Kırımlı, S.
Arıkan, U. Aktaş, Y. Gopşteyn, A. Nepomnâşiy, V. Gankeviç, N.
Yablonovskaya ve diger zemaneviy alimleriniñ qoşqan isseni qayd
etmeli. Bular tarafından izahatlı bibliografik köstergiçleri,
edebiy lağaplar ve eskirgen qırımtatar terminler luğatları,
tezis ve monografiyalar neşirge hazırlanıldı. Örnek olaraq,
Tahir Kerim ve Nariman Abdülvahapnıñ 2004 senesi "İlmiy
bülleten”de basqan "Millet” gazetasınıñ seçme bibliografik
köstergiçi”ni
alayıq. Mında berilgen malümatlarğa esaslanıp, biz Qırım
Müsülmanları Merkeziy İcraat Komiteti tarafından tesis etilgen
siyasiy, içtimaiy, iqtisadiy ve edebiy "Millet”gazetasınıñ
çıquv devirini ekige bölmek mümkün. Bu esaslı olaraq 1917-1918
ss. – cemaat erbabı, yazıcı H. Ayvazov ve 1919-1920 ss. –
arheolog, folklorcı O. Murasovnıñ muharrirligi altında çıqqan
gazeta. Çeşit vaqıtlarda qısqa bir müddet içinde gazetanıñ
başında A. Özenbaşlı, M. Refat, H. Odabaş, A. Lâtifzade
kibi icadiy şahslar tura. İ. Gaspralınıñ "Terciman”ına
köre, "Millet” gazetası medeniy ve milliy uyanuvından ziyade
qırımtatar halqınıñ siyasiy konsolidatsiyası oğrunda çalışa
edi. Faqat, bir-eki yılnıñ içinde ğazeta Qırım ehalisiniñ özü
kibi qırmızı terror, vatandaşlar muharebesi, almanlar istilâsı,
hükümetlerniñ avuşmalarını başından keçirip bayağı
qıyınlıqlarğa dayana. Neticede ise 1919 senesiniñ ortalarında
işi toqtala. Uzun vaqıt muddetinden soñra, Murasovnıñ
muharrirliginde faaliyetini ğayrıdan başlağan "Millet”
gazetası tamırdan deñişe. Evel mustaqil, faqat tsenzura yükünen
ezilmesi havflı olğan gazeta Qırım vaquflar idaresi altında
çıqa. Mündericesi sadeleşken, nüshaları teneffüzlernen çıqqan
"Millet” Sovet kündelik neşirlerniñ kölgesinde qala. Şahsen
H.S. Ayvazov bu devirni tarif etkende O. Murasovnıñ gazetada yapqan
hızmetlerini bile hatırlamay: "Millet” gazetası küçük
fasıllarle 1919 senesi Denikin ve Vrangel hükümetleri devrine
qadar devam idiyur...”. Velâkin şu arada muharrirni 20-ncı
senelerde "Qırım müsülmanları”
adlı gazetanı
çıqarğan bir avantürist olaraq belgiley: "Vrangel devrinde
Osman Murasof nam avantüristin idaresi altında Vrangelcilerin naşir
efkârı olmaq üzere "Qırım müsülmanları” namında bir
gazeta daha çıqarılıyur”.
Filologiya ilimleri doktorı, prof. İsmail Kerimovniñ hesaplarına
köre, H.S. Ayvazovnıñ muharirliginde çıqqan "Millet”
gazetasınıñ sayısı 400-den ziyade, O.M. Murasovnıñ
muharirliginde ise qararnen 80 nüshası çıqtı.
Qırımtatar zemaneviy tetqiqatçılar İ. Kerimov ve T. Qurşutovnıñ
bergen malümatlarına köre, "Millet” gazetasınıñ bazı
parçaları Rusiye ve Almaniya Devlet kütüphanelerinde bulunmaqta.
Birinci qırımtatar halq Qurultayı
azalarınıñ umumiy muharrirligi altında
|
Категория: Matbuat | Добавил: tairk (10/11/26)
|
Просмотров: 870
| Рейтинг: 0.0/0 |
Добавлять комментарии могут только зарегистрированные пользователи. [ Регистрация | Вход ]
|
|
Malümat sayısı |
Photo: 47 Blog: 2 Ekspeditsiyalarımız: 3 Failler konvolütı: 246 Maqaleler: 115 Qırıtatar folklorı: 238 Guestbook: 712 |
Kitaplarımız |
|
|