1920. – № 11 (62). – Yanvar 24.

Sudaqdan, Kefeden hususiy suretde aldığım bir-iki mektübda refiqlardan bir-iki efendi Qırım Aqmescid «OSVAG»ına[1] bazı bir tercimeler yazub köndermiş oldıqlarını beyan ile beni, «istediklerine binaen» guya, «OSVAG»da resmiy mütercim zann iderek, tercimeleri ve yolladıqları şeylerin basılacağı hususlarında kendilerine malümat virmemi ve lüzumiy suretde o yolda kendilerine «dil yardımda» bulunmamı «can ve göñülden» rica idiyurlar. Bınıñ üzerine ben «mecburiy» suretde şu cevabımın dercini münasib köriyurım: Keçen sene, sentâbr ibtidalarında resmiy suretde hükümet dairelerinden çıqarılan emirlere köre, ve burada bulunan bazı bir refiqların tarif ve tevsif itdiklerine köre, o künlerde yeñi açılan «OSVAG» idaresi bitaraf bir tarzda burada yaşayan umum milletlerin teraqqiyatına hıdmet itmek içün açılmış bir idare oldığından, «OSVAG» idaresiniñ teşviqat şubesi vastasıyle milletimiñ teraqqisine çalışılmaq mümkün olacağını zann itdigimden, «OSVAG» vastasıyle rus gazetaları ile beraber «Millet»in dahi intişarına bayağı yardımlar olacağını ümid itdigimden ve «OSVAG»dan telegramlar, hariciy Sovetler gazetaları almaq mümkün olacağından «OSVAG» ile ğayr resmiy suretde münasebete başlamış ve mütercim olmaq maqsadıyle ariza bile taqdim itmiş idim. Faqat bir qaç hafta zarfında «OSVAG» idaresiniñ bütün hareketi ve işleriyle aşna oldığımle, «OSVAG» idaresiniñ teraqqiyatdan ziyade başqa bir maqsad ve emel etrafında hareket başladığını añladığımle, 1919, oktâbr 9-ndan itibaren, ben «OSVAG» ile bütün münasebet ve alâqamı kesmişim. Ve o tarihdan itibaren, «OSVAG» ile hiç bir türlü münasebetde bulunmamışım ve «OSVAG» ile olan bir qaç haftalıq münasebetim de Sudaq ve Bağçasaraydan köndirilen iki tercimeyi baqmaq ile bir-iki ufaq ilân ve müracaatlar tercime idebilmişimdir. Binaenaleyh, Qırım «OSVAG»nıñ asıl tesisi ile soñradan «OSVAG»ın hareketi haqqında qısa bir malümat virmek ile beraber, orada hıdmeti olan refiqlara «OSVAG»ın resmiy memürlerine ve mütercimine müracaat itmelerini teklif idiyurım.

[1] Haberler Agenstvosı (rusça "Osvedomitelnoye agenstvo” söz ibaresiniñ qısqartması) / Алексеев Д.И., Гозман И.Г., Сахаров Г.В. Словарь сокращений русского языка: около 17.700 сокращений / под ред. Д.И. Алексеева. — 4-е изд., стереотип. — М.: Рус. яз., 1984. — 487 с. — С. 284.