1917.
– № 99. – Noyabr 8.
Qardaşlar!
İşte
meclis-i müessisana olacaq saylav künlerine beş kün daha qaldı. Siyasiy imtihan
künlerimiz keldi.
Noyabrin
on ikisi keliyur. Mühim ve qatiy künler yaqınlaşıyur. Bu künlerde bugün siyasiy
fırqalarınıñ kendi namzedlerini keçirtmek için mümkün olan her dürlü teşviqatı
yapacaqlarına hiç şübhe yoqdır.
Bu teşviqatlara artıq başlanıldı. Siyasiy fırqaqalar
bir tarafdan Qırımın her köşesine müşeviqlar
könderüb şifahiy teşviqatda bulundıqları kibi, diger tarafdan da yaldızlı
sözlerle hitabnameler neşir iderek saylavcıları kendileriyle rey virmelerini
teşviq idiyurlar. Bu vumleden olaraq kendi namzed cedveliniñ doquzıncı
sırasında bir müslimanıñ da namzedini qoyan 2-nci nomerolı «Narodnıy
sotsialist» fırqası duvarlarda, direklerde yapışdırdığı hitabnamesinde
müslimanları da kendilerine rey virmeye davet idiyur ve: «Eger vaqıf
topraqlarıñızın kendi eliñizde qalmasını isterseñiz reyleriñizi «Narodnıy
sotsialist»lerin namzed cedveline viriñiz!» diyurlar.
Arqadaşlar!
Saqın bunların bu yaldızlı sözlerine, bu tatlı vaadlarına qapılmayıñız.
Sözlerin vaqıf topraqlarıñız, bir daha elden çıqmamaq üzre kendi idareñize
keçmişdir. Onları muhafaza ve hüsn-i idare idecek ise ancaq tatarların
kendisidir. Bunıñ için 9 nomerolı cedvelden başqasını tanımayıñız! Doquz
nomerolı ispiskodan başqasına rey virmeyiñiz. Sizin diliñizi, diniñizi,
namusıñızı muhafaza ve müdafaa idecek, milliy ve siyasiy huquqıñızı alub size
virecek; malıñızı, mülkiñizi, toprağıñızı ve tarlañızı muhafaza ile her hususda
sizin saadetiñize çalışacaq ancaq tatardır, ancaq Umumtatar Vekilleri Syezdi
tarafından intihab idilerek 9 nomerolı cedvel ile isimleri ilân idilmiş
kişilerdir.
Milletdeşler!
Aldanmayıñız!
Hiç bir fırqanıñ teşviqatına, hiç bir partiyanıñ ihfalatına, hiç bir kişiniñ,
hiç bir maşuqın (agitatorın) tatlı sözlerine aldanmayıñız! Sizleri sizin qadar,
belki daha ziyade, düşünecek, sizin qaydıñızı çekecek, sizlerin her hususda
hür-serbest, rahat, mesud olmañıza çalışacaq yine kendi qardaşlarıñız, kendi milletdaşlarıñız,
kendi dindaşlarıñız, kendi qan qardaşlarıñız olacaqdır.
Dindaşlar!
Saqın
aldanmayıñız, saqın qapılmayıñız! 9 nomerolı cedvelden başqasını tanımayıñız.
Reyleriñizi ancaq 9 nomerolı cedvele viriñiz. 9 nomerolı cedvelde kösterilmiş
kişilerin kimler oldıqları, sizlere yalıñız boyları, qıyafetleri, yüzleri
qaşları, sesleri ve sözleriyle degil, belki işleriyle, hareketleriyle,
fedakârlıqlarıyle malümdir. Bizler bu soğuq ve yağmurlı havalarda evlerimizde,
rahatlıqlar içinde bulundığımız halda onlardan biri uyqusından, rahatdan
ayırılub Herson cöllerinde, qarlar, buzlar, yağmurlar altında olaraq üç seneden
beri siz onlardan ve onlar sizlerden ayırı oldığıñız askerleriñizin Qırıma
kelmesine çalışıyur. O yalıñız bu hususda degil diger hususlarda da sizler için
pek çoq fedakârlıqlar ve büyük, büyük hıdmetler itmişdir. Onıñ bütün bu
fedakârlıqları aceba kimin içindir? Tabiiy sizler için, sizlerin rahatıñız
içindir.
9
nomerolı cedveldeki adamlardan ikincisi ise memleketde anarşi çıqtığı künden
itibaren Qırım Müslimanları İcra Komitesiniñ teşebbüsiyle teşkil idilmiş Qırım
inqilâb heyetiniñ başına keçerek kice-kündüz Qırımda sulh va asayişın
bozulmamasına, qırımlıların rahatlığı ihlâl idilmemesine çalışmaqdadır.
Birincisi
bütün manasıyle tatarın dirilmesine, canlanmasına, yaşamasına, rahat ve mesud
olmasına çalışan ve tatarın saadeti oğurında icab iderse çoqdan şehid olmaya
bile and iden ğayur, fedakâr, qahraman tatar oğlu tatar Cafer efendi qardaşımız
ve arqadaşımızdır.
Şanlı
ecdadımızın haqiqiy torunı olan Cafer efendi Seydahmed, harb hatlarında,
okoplar içinde, hayat ile memat arasında bulundığı zamanlarda bile kendisini
degil belki yalıñız milletini, tatarını düşünmiş, milletine saadet virecek
yollar aramışdır.
Cafer
efendi okoplar içinde, müdhiş top gülleleri, öldirici bomba ateşleri, qurşun
yağmurları altında bulundığı zamanlarda tatara hıdmet idecek bir qaç eser
yazmışdır, ki bunlardan biri «Milliy duyğu» olub «Millet»de tefriqa suretiyle
derc idildi. Digeri «Unudulmaz közyaşlar» olub «Terciman» gazetasında yine
tefriqa suretiyle basılmışdı. Bunlardan ğayırı henüz basılmamış qaç eseri daha
vardır ki bunlarda harb hatında qaleme alınmışdır.
Cafer efendi Seydahmedin yalıñız inqilâbdan soñra
yapdığı hıdmetler o qadar çoq, o qadar büyükdir, ki bunları yazmaq ve tadad
itmek için «Millet» sahifeleri kâfi degildir. Cafer arqadaşımızın hıdmetleri
yalıñız milliy, ictimaiy, iqtisadiy sahalarda degildir. O pek çoq siyasiy işler
de yapmışdır. Qaç defa Kiyevde olan Umum federalist milletler Syezdinde ve ukrayinalıların
Merkeziy idaresinde Gruşevskiyler qarşusında Qırım meselesini tatarın arzusına
muvaffaq bir suretde hal itdirmiş ve bütün federalist milletlere: «Qırım
qırımlılarındır» şiarını tasdıq itdirmişdir...
İkincisi
her meseleye ceditle baqmaq her işde ğayet ihtiyatkârane ve basiretkârane
davranmaq hasletine malik arqadaşımız Ahmed efendi Özenbaşlıdır, bu arqadaşımız
da siyasiy ve idariy işlerde büyük, büyük hıdmetler itmiş ve hazırda Qırım
inqilâb Komitesiniñ başına keçerek Qırımın nizam ve intizamınıñ bozılmamasına
fevqalâde bir diqqatle çalışmaqdadır.
Ahmed
efendi arqadaşımız, idariy işlerde kösterdigi istidat ve istihqaq sayesinde
bugün Qırım inqilâb heyeti tarafından Qırım komissarlığına tayin idilmişdir.
Ahmed
efendi, idadiy mektebinde iken dirseklerini rahlelere dayayaraq, başını qolları
arasında alaraq tatarı düşüniyur; tatarın keçirdigi ağır elim hallarımızdan soñ
derece مناژ
oluyur,
tatarın ne suretle mesud olabilecegi çareleri arayurdı.
Ahmed
Özenbaşlı biraderimiz de Cafer efendi kibi aliy tahsil körmiş bir efendi olub o
da başdan ayağına qadar bir tatar inqilâbçısı bir tatar demokratıdır. O da
kendi milleti için, kendi milletiniñ saadeti için, öz milletiniñ de huquqınıñ
başqa milletler tarafından tanılması için hulâsa tatarın da mahkümiyetden qurtulub
serbest ve rahat yaşaması için kendi hayatını, canını feda itmeye and itmiş bir
qahraman tatar fedayisidir.
Kerek
Cafer efendi ve kerek Ahmed efendi her ikisi de kündüzleri sabahdan aqşamlara
qadar bilfil tatarın faidesine çalışdıqları kibi, kiceleri de sabahlara qadar
tatarın saadeti için düşüniyur, ve yatağa yatdıqları zaman Qırım ve qırımtatar
meselesini haqqıyle hal idebilmek için yasdıqlarınıñ közyaşlarıyle ıslandığı da
bir çoq defalar körülmişdir.
İşte
9 nomerolı cedvelin birinci ve ikinci sırasında bulunan namzedlerimiz milleti
için bu qadar fedakârlıqlar yapmış ve bundan böyle dahi yapmaya and itmiş
qahramanlar iken, bizler nasıl olub da narodnıy sotsialistlerin ve diger
fırqaların namzed cedvellerine rey virebiliriz.
Biz
Qırımda hiç bir tatar tasavvur idemeyurız, ki kendi reyini 9 nomerolı cedvelden
başqasına virsun!..
Biz
Qırım yarımadasında hiç bir müsliman düşünemeyurız, ki öz reyini 9 nomerolı
cedvele virmekden imtina itsun... Bunı yapsa, yapsa yalıñız adları tatar,
müsliman olub da qalbleri, yürekleri tatar ve müsliman olmayanlar olacaqdır.
Biz ise kendi aramızda qalbleri tatar-müsliman, qalbleri milliy kâfir olanların
artıq qalmadığına inanmaq isteyurız.
Eger
tatar, müsliman adını taşıyub da aramızda 9 nomerolı cedvelden başqasına rey
virenler olursa bilmiş olsunlar, ki onlar pek büyük milliy bir cinayet işlemiş
olacaqdırlar... Evet, her kes, haq intihaba malik her saylavcı kendi reyini
istedigi cedvele virebilir. Bu hususda o sahib-i ihtiyardır. Faqat bugün bizim
siyasiy mevqimiz ve vaziyet-i hazıramız köze alınırsa umum tatarın ancaq 9
nomerolı cedvele rey virmesi lâzim, belki de farzdır. Çünki bu hepimizin milliy
bir borcımızdır...
|