1917. — № 17. —
İyül 20.
Qırım müftisi Çelebicihan efendi aleyhine vilâyet komissarı
Bogdanovın vilâyet Komitesi İcraat Bürosında Tatar Batalyonı işleri haqqında
virdigi dokladından soñra Büro tarafından "mesele”-i mezküre olaraq
prokurorın müdde-yi umimiyeniñ bu işe dair tahqiqat-ı adliyeye kirişmesine ve
elde idilecek neticeniñ hükümet-ı muvaqqataya haber virilmesine qarar virildigi
ve komissar efendiniñ bu hareketi İcraat Bürosı tarafından tasvib idildigi
"Y.V.” gazetasınıñ naqlen dünki nüshamızda yazılmışdı.
Biz bu haberi oqurken, taacibler içinde qaldıq!..
Parlaq bir maziye, şanlı bir tariha malik olan umum qırımtatarlarnıñ
intihable mahkeme-i şeriye başına qoydıqları reis-i ruhaniyeleriniñ yine umum
Qırım müslimanları tarafından intihab olunan Qırım Müslimanları İcra Komitesi
reisiniñ haqqa, haqiqata, qanuna ve Qırım Müslimanları İcra Komitesiniñ
qararına, tatar askerleriniñ şanlı arzularına ve nihayet irade-i milliye
istinaden atdığı haqlı, meşru bir adımından dolayı; vilâyet komissarınıñ bir
qaç provakatorın donoslarına ve "Yujnıye vedomosti” gazetasınıñ melüt
sahifelerinde derc idilen fitnekârane bend ve habere binaen, Vilâyet Komitesi
Bürosında "işi”ni baqdırması ve haqqında taqibat-ı qanuniye icra
idilmesine qarar virdirmesi bilhassa böyle hürriyet ve adliyet yaşadılacağı ve
her milletin haqqı tanılacağı bir zamanda büyük bir haqsızlıq olmaqle beraber
aynı zamanda müftiy efendiyi ve onı saylayan qırımtatarlarnıñ namus, dini ve
milliyesini tahqirden başqa bir şey degildir.
Vilâyet Komitesi İcraat Bürosında müslimanlardan da iki aza oldığı halda,
Boğdanov, tatar batalyonı ve müftiy efendi işleri haqqında muzakere Büroda doklad
virdikde ve müftiy haqqında taqibat-ı qanuniye qozğalması baqıldıqda Büronıñ
müsliman azaları çağırılmadığı kibi, umum qırımtatarına taliqı olan bu işin
muzakeresine Qırım Müsliman İcra Komitesinden de hiç kimse davet olunmamışdı.
Komissar Bogdanovın işin asılını haqiqatını teftiş itmeden Qırım müftisiniñ
hükümet-i muvaqqataya inqiyad itmedigine hüküm itdirmesi ve onıñ haqqında
taqibat-ı qanuniye ve taqibat-ı adliyeye kirişilmesine qarar virdirmesi hoqqa,
qanuna tamamen muhalef oldığı kibi, müslimanlığımızı, tatarlığımızı da
lekelemek dimekdir.
Eger komissar efendi eski idaredeki gubernatorların hükümet-i mutlaqa
tarafından tayin idilen müftiler haqqında yapdığı muameleyi bugün umum
müslimanlar tarafından intihab idilen müftiy haqqında yapmaya qalqışırsa,
bilmiş olsun ki, qırımtatar buña musaade itmez. Zira, bugünki müftiy yaptığı ve
yapacaq işlerinden yalıñız millete qarşu mesuldir. Onıñ haqqında tahqiqat icra
itmek lâzim kelirse, bu iş komissarın, prokurorın degil, belki Dahiliye
Naziriyle senatonıñ vazifesidir. Bunıñ için komissar efendiniñ bir qaç
provakator donosına[1] "Y.V.”de fitnekârane bir maqsadle
yazılmış melüt satırlara baqaraq, umum qırımtatarı tarafından seçilmiş müftiy
aleyhinde, tatarın kendisine muracaat itmeden Vilâyet İcra Bürosında taqibat-i
qanuniye icra idilmesine qarar virdirmesi ve müftiyi hükümete itaatsızlıqla
itham itdirmesi haberi hiç şübhe itmeyurız ki, bütün qırımtatarnı heyecana
ketirecek ve komissarı bu haqqsız hareketlerinden dolayı protestoya mecbur
idecekdir.
Zira, umum Qırım müslimanları tarafından seçilerek iş başına ketirilen bir
reis-i ruhaniy ve milliyi tahqir itmek — bütün Qırım müslimanlarını tahqir
dimekdir: "Millet” ve "Millet”çiler vilâyet komissarına bu haqsız
işinden dolayı aleniy olaraq protesto beyan idiyur.
Tatar askerleriniñ ayırı batalyon teşkil itmeleri ve Aqmescide kelecek
Qırım Atlı Polkına qoşulmaya qarar virmeleri meselesinde müftiy efendiniñ
oynadığı meşru ve haqlı roli bir qabahat sayılıyursa, roli müftiy efendi
yalıñız başına yapmamışdır. Bu hususda müftiy efendi qaç adım atmış ise
hepisini umum qırımtatarı tarafından sayılanan İcra Komitesiniñ qararıyle
atmışdır.
Bu halda niçin yalıñız müftiy efendi itham idiliyur? Niçin yalıñız müftiy
haqqında taqibat-ı qanuniye icrasına qalqışılıyur? Kerek provakatorlar
ağızından, kerek "Y.V.” gazetasından niçin yalıñız müftiy Çelebiyev
haqqında şikâyetler yükseliyur da, Komite haqqında tamamen süküt idiliyur?
Eger müfti itham idilmek isteniliyursa, eger müfti haqqında taqibat-ı
qanuniye idilicek olur ise, bu halda bütün Komite heyeti itham olunmalı, bütün
Komite azaları haqqında taqibat-ı qanuniye icra idilmelidir!
Eger tarihiy, milliy ve meşru huquqımızı istedigimiz; qırımtatarnıñ da bir
millet oldığınıñ tanılmasını, onıñ da diger milletler kibi huquqına hürmet
idilmesini talab itdigimiz, bir çoq senelerden beri kösterdigi sadaqatlarına
rağmen huquqsız, hürriyetsiz qaldırılaraq mahrumiyetler, esaretler içinde
çekişekelen müslimanların bugünki inqilâb ve hürriyetin virdigi haqlardan
istifadeye qalqışması vatana hiyanet, hükümet-i muvaqqataya itaatsızlıq
tanıtdırılmaq isteniliyursa, milliy provakatorlar, milliy hafiyyeler ve
komissar efendi hepimizi itham itsünler. Hepimizin, bütün Komite ve mahkeme-i şeriye
heyetleri haqqında tahqiqat-ı adliye icra itdirsinler.
Tatar! Seniñ 25 martda sayladığın, muqadderat-ı diniye ve milliyeñi, bütün
siyasiy ve ictimaiy işleriñi kendisine tevdi itdigiñ mahkeme-i şeriye ve İcra
Komitesi heyetlerine, başda reisi olmaq üzere provakatorların donoslarına
binaen kadetler leke urmaq isteyurlar!
Qardaş! Üç seneden beri yuz biñlerce oğulların, qardaşların, dindaşların
harb meydanlarına vatan müdafaası oğurında düşmanle köküs kererek cenk itmekde
ve vatan oğurında şehidler virmekde iken onların bu fedakârlıqlarına, onların
vatan için virdikleri qurbanlarına qarşulıq olmaq üzere burada vicdanınıñ
hükümiyle sayladığıñ, kendisine itimad itdigiñ ve her işiñni kendisine havale
ile dikik İcra Komitesi ve reisi, yalıñız provakatorların donoslarına binaen
itham itdirilmek, lekelendirilmek isteniliyur.
Milletdaş! Her milletin diniy ve siyasiy huquqları tanıldığı, her qavm ve
qabiliyetin arzuları, talabları isaf idildigi bu hürriyet ve halq hakimiyeti
zamanında bile seni esaret içinde tutmaq; eliñi, ayağıñı bağlamaq, ağızıñı,
diliñi zıncırlamaq isteyurlar. Seni yine mahkümiyetler içinde tutmaq, başın
ücinda ölüm kölgeleri, qorqu lekeleri, esaret qaranlıqları uçurtmaq, eski
idaredeki kibi seni komissarlar, prokurorlar ve bu suretle ruhıñı, ümidiñi,
imanıñı qırmaq isteyurlar.
Lâkin, biz eminiz kesen, tul qalmış kelinleriñle, yetim qalmış
çocuqlarıñle, nişanlısız qalmış qızlarıñle içeri hüzn ve közyaşlarıyle dolmış
közleriñle, boşalmış köyleriñ, küçülmiş cemaatıñ, sönmiş ocaqlarıñle
dayanamamazsıñ! Seniñ için bu hürriyet devrinde açılmaq istenilen eski
mahkümiyet, menhus zillet qapusından içeri kirmek degil, belki o qapıyı
ebediyen qapatırsıñ!..
Zira, bundan böyle tatar milleti
yüzine degil, naşına bile tükürmeye müsaade itmeyecekdir...
[1] yani pravokatorlıq bir şikâyet
|