Zemstvo ve sehim[1] saylavları

1919. — № 48. — Fevral 28.

Bir millet ve memleketni köçürmek içün bir talay idareler qurulur. Bu idareler o millet ve memleketniñ her türlü işlerini baqar. Onıñ baş yazısı çızarlar: mekteb-medreseler açar, yollar yasatır, hastahaneler qurar, poşta-telegraf ve telefonını tüzüşdirir, rahatlığını qorçalar, kerek olsa asker toplar, cenk açar ve daha bunday şiyler...

Halq hakim olğan yerlerde bu işlerni yapacaq kişilerni halqnıñ özi saylar.

Bu yaqınlarda bizim Qırımımızda bunday saylavlardan ikisi birden olacaqdır. Bunlardan birincisi zemstvo sayavları, ikincisi sehim saylavlarıdır.

Zemstvoğa saylanacaq kişiler memleketimizniñ işleklik, medeniy ve yarıqlandırıcı işlerini baqacaqdır. Zemsvolarnıñ bir memleketde ne qadar büyük rol oynağanını uzun uzadıya yazmaq içün biz kerek körmiymiz. Bunı tatarnıñ eñ çet bir köyinde oturğan eñ qara bir tatar bile añlay. Biz bunı bu satırlarda […] bu qadarçıqnen eske ketirib taşlamaq ve bu yolda bütün tatarlarnıñ közlerini açıb çalışmasını yalvarmaq istiymiz. Bu hususda çalışılacaq eñ birinci noqta davuş vereceklerden hepisiniñ adlarını kitib yazdırmaları ve saylav küninde qalmayıb öz qaydlarını közetecek adamlarğa davuş taşlamalarıdır.

Her taşlanmağan davuşnıñ tatar içün pek büyük zararı vardır. Bunı ocalarnıñ ve milletniñ ileri kelgenleriniñ halqlarğa añlatmaları kerekdir.

Biz yuqarıda zemstvolarnıñ memleketniñ işleklik, medeniy ve yarıqlandırıcı işlernen oğraşacaqlarını yazğan edik. Lâkin bu işlerni körecek adamlar millet tarafından saylanğanları içün ehemmiyetli zamanlarda bunlar daha başqa hususlarda da qararlar verib olurlar. Hepimiziñ aqılındadır ki, Solomon Krım hükümetini iş başına ketirgenler bu zemstvo adamları olğandır. Eger o zaman zemstvodaki muçeler, azalar arasında bizim tatarlardan da olğan olsa, bugünki hükümetni qurğan adamlarnıñ hiç olmasa birer cüziy tatarlardan olacaq edi.

Bütün Qırım sayesine saylanacaq kişiler ise Qırım içün siyasiy, medeniy ve daha başqa türlü ne qadar işler olsa, hepisini baqacaq ve qarar verecekdir. Bu, memleketdeki idarelerniñ eñ üst ve eñ çoq küçke malik olğan bir idaresidir. Buña Qırımnıñ "baş yazısı” demek kerçekden de caizdir.

Bunıñçün de eñ birinci çalışılacaq noqta yuqarıda zemstvolar içün aytqanlarımızdır.

Ana, millet ve memleket içün bu qadar ehemmiyetli olğan bu saylavlarğa, eger eski day başqaları tarafından ve başqalarınıñ faydalarına qurban kitmek istemese, tatarlarnıñ da bu yolda çalışması kerekdir.