1919. — № 47. — Fevral 27.
Solomon Krım hükümeti iş
başına kelgenden berli qırımtatarnıñ bütün varlığına çalışıb meydanğa ketirgen
işleri, yapuvları çeşid türlü yollarınen hırpalanma sarsılmaq istenile edi.
Bundan üç kün evel bu istek artıq temeli ve özine lâyıq biçimni aldı.
Qırımtatarnıñ haqlı ve qanunlı olaraq qurğan bütün yapuvları, saylanğan adamları
ortada hiç bir sebeb olmadan, aqtarıldı, tintildi.
Aqtaruv ve tintüv degen
şiy her zaman her hükümet tarafından olaturğan şiylerdir. Bilhassa kendisiniñ
küç ve nüfuzını, milletniñ arzularına uyğun ve onıñ isteklerine köre
quruşdırmaqdan uzaq olğan hakimiyetler içün bu, eñ büyük vastalardan biridir.
Bu soy hakimiyetler milletden soramaz, milletniñ arzularına qulaq asmazlar,
tersine milletni zorlar, milletni küçnen boyun egdirmege mecbur eterler.
Tek öziniñ istek ve
erkeliklerinen idare olunğan eski orus padişalığı zamanında aqtaruv ve
tintüvniñ ne qadar keniş bir biçim olğanını her kes bile. Lâkin her şeyde
olğanı kibi, bu işniñ de özine köre bir yolı, bir qanunı vardır.
Aqtaruv ve tintüv iki
türlü olur. Birincisi ayırı hususiy kişiler haqqında, ikincsi resmiy yapuvlar
haqqında. Hususiy bir kişini varıb tintmek içün tintmege kelgen memurlarnıñ
ellerinde qaydan kelgenlerini ve ne içün tintmek istegenlerini köstergen
resmiy, mühürli bir kâğıdları olur. Onı eñ başda tintecekleri adamına kösterir,
tintmek içün ruhset isterler, eger qarşı turmaq istese, zornen tintib kiterler.
Resmiy yapuvlarğa kelgende
ise iş bütün bütünge başqa türlü yapılır. Bunlar hükümetniñ öz qanunlarına
uyğun ve onıñ emniyetini qazanğan ve oña yardım etmek içün qurulğan yapuvlar olğanından
hükümet bunlarğa her istegen zamanında elini uzatıb olmaz.
Hükümet bir memleketniñ
saadetine, rahatlığına çalışqan eñ büyük ve eñ üst bir idare demek olğanından
onıñ yapacağı işleriniñ daima ciddiy ve daima qanunlı bir suretde yapılması
kerekdir. Bu ufaçıq balalarnıñ bir saat evel birisine bir qoqla bağışlab,
ikinci saatı qaytarıb alğanı kibi bir hükümetniñ de bir ay evelsi bir cemiyetke
ve ya bir idarege qarşı yapqan antını ikinci ayında qaytarıb alması pek külünç,
pek aşağı bir şey olmış olur.
Bilhassa Solomon Krım
hükümeti kibi hiç bir milliy esasqa dayanmayıb tek on sekiz adamnen
quraşdırılıb çıqarılğan bir hükümetniñ qırımtatar Parlamenti ve milliy
idareleri kibi memleketniñ eñ büyük bir qısımı tarafından qurulğan yapuvlarını
kelişi güzel kelib [...mesiniñ] oruslarnıñ aytqanına köre pek "kosolapıy” bir
iş olğanını körüb de qasqaldap külmemek mümkün tügüldir.
Bu tintilüvniñ nasıl
yapılğanını iki kün evel gazetamızğa yazğan olsaq da meseleniñ aytqanımız kibi
pek qolaysız bir biçimde yapılğanını ve buña qarşı tek mısqıllab külmeden
başqax bir şiy yapılamayacağını köstermek içün işni biraz daha açmaq istiymiz.
Özleriniñ Qırım hükümeti
tarafından yiberilgenlerini aytmadan başqa ellerinde hiç bir dokumenti,
temel kâğıdı olmağan bir talay prokuror arqadaşlarından hiç bir şiy añlamaq
mümkün olmağanını körgen Qırım Parlament Bürosı
reisi Seyidcelil efendi Hattatov bu işniñ nasıl ve ne içün yapılğanını soray,
buña qarşı ise şu qarşılıqnı ala:
— Canım, siz öziñiz de
oqumadıñızmı ki, bundan bir qaç kün evel "Haq ses” gazetası siziñ Parlamentonıñ
asker cıyılmasına qarşı agitatsiya yapqanını ve siziñ Türkiye ile münasebette
bulunğanıñıznı yazğan eken!.. Bunıñçün biz de sizni tintemiz!..
Seyidcelil efendi bu
cevabnıñ pek balacasına olğanını körüb bunıñ "bir zamanda var eken, bir zamanda
yoq eken...” biçimindeki masallarğa oşağanını ve eger bunday yazılarğa baqılıb
tintüv kerek olsa gazetalarnıñ Solomon Krım hükümetine qarşı yazğanlarına köre,
bu hükümetniñ hiç bir şiyni olmağanını ayta ve buña qarşı ise deren-deren
manalı baş sallamalarından başqa qarşılıq alamay. Bu hal tatar Parlamentiniñ
şkâf ve çekmeceleri ve diger milliy idare şubeleri ve büro muçelerini tintkende
de aynı suretle qaytavlana.
Bundan añlaşılğanına köre,
Solomon Krım hükümeti yapqan işlerinde bir hükümetniñ riayet etmesi kerek olğan
eñ ibtidaiy faidelerni bile tanımaq istemegen bir hükümet olub çıqa. Lâkin bir
bala içün bağışlanıb olacaq bu erge — kapriz
hallar bir hükümet içün hiç bir zaman bağışlanmaz.
Tatar milleti kendi
varlığına qarşı yapılğan bu yolsız işke qarşı susmayacağı kibi, qırımtatar
Parlamentiniñ evelden berli qorçalab keldigi bütün Qırım sehimi de bu yolda öz
sesini yükseltecekdir. Bunlardan başqa bu halnıñ bütün dünya milletleriniñ
biri-birinen keçinmelerini köstergen qanunlar tarafından da çelteklenib
baqılacağı şübhesizdir.
|