Tatar idareleriniñ ve
tatarlar tarafından saylanğan bazı kişilerniñ tintilmesi üzerine tatar
Parlamenti bürosı bir protest
yazıb Qırım yerli hükümtine ve gazetalarğa vergen edi. Bu protest münasebetiyle
"Tavriçeskiy golos” gazetası bu yapılğan işiniñ tatar milletine qarşı olmayıb
tatar idarelerine qarşı olğanını ve bundan tatar milletiniñ canı ağırmaması
kerek olğanını yaza!..
Biz bunı bir türlü añlab
olamaymız. Biz milletni aşağılamaq ve onıñ canını ağırtmaq içün o milletniñ her
ferdini tutub ayırı-ayırı hepisiniñ qulağını çekmekmi kerek aceba?!.
Her millet öz işlerini
baqmaq içün öz arasından bir talay kişiler ayırır. Bu kişiler toplaşır, bir
idare qurar ve bunıñman özini saylağan kişilerniñ işlerini baqar, faydalarını
qorçalar. Bu saylanğan kişiler o milletniñ tamam yerini tutar, onıñ adından iş
körürler. Onıñçün onlarğa yer — tutar "vekil” derler.
Bir adam öziniñ yerini
tutmaq, öz adından laf aytmaq içün başqa birini kösterse, bu kösterilgen adam
da başqa birisi tarafından aşağılansa, balçıqlansa, hiç şübhe yoqdır ki, bu
yapılğan iş bu kösterilgen adamdan ziyade onı köstergen adamğa aiddir. Hususiy
adamlarnıñ köstergen yer tutarları böyle olğanı kibi bir milletniñ yerini
tutqanlarğa qarşı yapılğan iş de şaydır. Bir milletniñ milliy idarelerini,
parlamentini, saylağan kişileriniñ aşağılatması, o milletniñ öziniñ
aşağılatması demekdir. Bu huquq ve kerçek bilgisiniñ elifbasıdır. Biz "Tavriçeskiy
golos”qa bunı aytmaqnı bir borcımız, deb tanıymız. Bunı tatar milletniñ özi de
aytacaqdır.
İkincide kene bu ğazetada
bu yapılğan tintüvniñ qanunlı bir suretde olğanı yazıla. Bu yolda biz
"Tavriçeskiy golos”qa tünevinki maqalemizni oqumasını yalvarırmız.
|