1918. – № 99. – Avgust 23; №
100. – Avgust 26.
Köresiñiz,
men yazğan şiylerimniñ hepisinde köylüni qarşımda tutam, onıñ añlab olacağı bir
yolda, añlab olacağı bir til ile onıñ çatılğan qaşlarını çezmek, yumulğan
koñlini açmaq içün tırışam. Men Qırımda tatar arasında eñ büyük sayınıñ
köylülerimizde olğanını körgenim ve özüm de kerçekden bir köyli olğanım içün
mında hatırı sayılacaq, sözi diñlenecek, söz diñletdirilecek bir boy olsa, onı
da köylilerdir, deb bilem. Bizde daha şeherliler boyı ortağa çıqmadı, desem,
pek o qadar yañlış olmam. Aramızda şeherde oturğan tatarlarnıñ da pek çoğı kene
köyli tüsini taşıylar. Köylüler fen-i şeherlilerniñ arasında ayırılıqlar vardır.
Men köylü, deb toprağınıñ, çift çubuğınıñ başında, tatarlarınıñ bağ-bağçalarnıñ
içinde qara yerniñ sert, qatiy bavrını tırmalab öz ötmekni taşdan, topraqdan
çıqarğan kişilerge diymen. Köylüler milletniñ temeli, temel taşıdır. Bizniñ
tatarnıñ eñ çoğı bu boydandır, köylülerden soñ kelgen boylar işlerini hep
onlarnıñ üstüne qurarlar. Köylüniñ çıqarğan boğdayını un etib, hamur basıb,
balaban furunlarda çeşid ötmekler, qalaçlar, perojenıyler yasab, pişirib
çıqarlar. Onıñ tavdan kesib ketirgen odunlarını yüntub, erindeleb türlü-türlü
evler, dolablar, qutular yasarlar. Kene köylüniñ yetişdirgen hayvanlarnınıñ
terisinden ayaqqablar, cüzdanlar ve daha bundayın bir çoq şiyler yasab meydanğa
ketirirler. Güzel qutularnıñ içinde, ağız tatıman aşağan konservalarımıznıñ yemişlerini
asrağan da – köylülerdir. Qara topraqnıñ deren tamırlarından çekilip çıqarğan
demirler, kömürler de şay.
Dimek
aşaycaq, içecek ve yaqacaq kibi kişige eñ başda, eñ birinci kerek şiylerni
birinci asrağan, meydanğa ketirgen köylü, avul halqıdır. Şeherliler bu
şiylerni, aytqanım kibi, soñ yaldızlar, yıltıratır, cicili biçimli bir halıña
qoyarlar. Şeherlilerniñ bu payına «zenaatçı»lar dirler. Bir de bu
zenaatçılarnıñ yasağan şiyleri bilen köylilerniñ çıqarğan çiy şiylerini
biri-birine kötürüb ketirgen kişiler vardır ki, bunlarğa «alış-virişçi»ler
dirler. Alış-virişçiler bir şiyni ne asrab çıqarır, ne de yasab ortağa
qoyarlar. Tek iki yaqnıñ da hazırlağanlarını anda-mında taşır, bunıñ sırtından
yaşarlar. Bu zenaatçı, alış-virişçilerden başqa şeherlerde bir de
«hıdmetçiler-memurlar» vardır. Bunlardan bir boyı halqnı düşmanlardan,
hırsızlardan, qavğa-dögüşden qorçalarlar, bunlarğa «asker», «politsiya»,
«jandarma», dirler, bu boyı halqlarınıñ arasındaki uyğunsızlıqlarnı yatışdırır,
barışdırırlar.
Bunlarğa «qadılar», «müftiler», «hakimler»,
«sudyalar» dirler. Bu boyı halqlarğa kerek şiylerni ögretirler. Bunlarğa «[h]ocalar,
müderrisler, imamlar» bir boyı da kerek olğan şiylerni ögrenmek içün kerek
olğan şiylerni yazarlar, bunlarğa da «kitab yazıcıları», «gazet yazıcıları»
dirler. Halqda olğan bütün boyunlarnıñ hepisi de kerekdir. Bunlar köz, ağız,
burun, el, ayaq kibidirler. Bunlardan birisiniñ olmayuvı hepisi içün de
zararlıdır. Lâkin, işke şayna bir topdan-topdan qarağanda bu boylarnıñ arasında
eñ faydalısı, eñ kereklisi köyli olub çıqar. O birleri hep onıñ celkesine
cantayırlar. Halqda birinci ağız, birinci qol köylüdir. Bunı körüb añlağan
milletler köylilerge kerçekden köz atqan, el uzatqanlar. Onlarnıñ yapqan
işleriniñ doğrı kitmesi, daha qolay, daha yahşı yapılması içün çeşid türlü
maşinalar yasab köstere, onlarnıñ arasına tarta, dağıtalar.
Tüşüncelerini
açmaq, keñişletmek içün de onlarnıñ añlab olacağı, bir yolda, añlab olacağı bir
tilde bir çoq kitablar yazıb çıqara, mekteb, medreseler açalar. Bunday milletlerde
«halq kitabları», «halq edebiyatı» degende, onı eñ birinci sırağa qoya, eñ
birinci kişiler onıñ içün oğraşalar. Germanlarnıñ bugündeki üstünlikleriniñ eñ
birinci sebebi köylileriniñ yüksekligi añlayışlığıdır. Germaniyada hiç bir köy
yoq ki, onda mekteb, kitab evi olmasın; gazet kelmesin, hiç bir köylüge
rastkelmezsiñ ki, o oqub-yazmaq bilmesin. Men anda yaşağan bir zamanımda
oturğan üyümniñ qonaqbayı oruslarda oqub-yazmaq bilmegen kişilerniñ de
tapılğanını menden pek yaman şaşıb, pek yaman taaciblenib sorğan edi. German
tilinde «gramotnıy – oqub-yazmaq bilgen», degen söz yoq. Çünki onlar
oqub-yazmaq bilmegen bir kişi tüşünüb olamaylar ki, bizge kelgende «gramotnıy»
sözi «general» quruntusı bere.
Soñ,
men qarayman bir de bizniñ köylüge, biz, o zavallığa ne berdik? Şindige qadar
yazılğan quçaq-quçaq yazılarnıñ arasında o zavallı içün qaç satır yazıldı? Qaç
kitab çıqarıldı, qaç maşina yasalıb berildi? Halbuki, o bizni asray, o bizge
ötmek, aqça bere. Biz onıñ tuz-ötmegimen ösüb çıqa, mañnay terimen qazanğan
aqçası ilen mekteb, medresege kire, oqub çıqamız. O bizge tapqannı, tapacağını
aşata da aceba biz yazğan yazılarımızda onıñ içün qaç satırlıq bir yer
ayıramız? Azaçıq başımıznı tüzeltib olsaq, oña qarşı kelgende ya orusça, ya
arabça, yaki farsice aytamız. Tüşüneyik bir parçaçıq, ey, yazıcı ağalar, biz
kimniñ arasında yaşay, kimin içün yazamız? Canım, yalvaram, eliñizni köksüñizge
basıb aytıñız, o bizniñ [h]ocalarımızdan ezberleb kelib yazğan «hadisat-ı
ictimaiye», «alem-i nisvana bir nazar», «kalavil ifrat-ı tenqid», «teferruat-ı
tenqid», «tariq-i temsil» ve ya «talim-terbiye-yi etfal»lerimizni qaç köyli,
daha özini aytayıq, qaç tatar añlay? Eger biz yazğan şiylerimizni üç-dört yuz
biñ canlı qırımtatarnıñ içinden tek bir qaç yuz [h]oca, yaki sohta içün yazsaq,
yahşı tüşüneyik ki, üstümizge alğan borcumıznı ödemiymiz dimekdir. Biz bugün
hepimiz halqnıñ hıdmetçisi, memurımız. Bizge şorbacımıznıñ buyruğını, istegini
yerine ketirmek kerekdir. Biz oña bir şiy añlatmaq istesek, onıñ tapılğan
yerine tüşecek, ondan yuqarı alıb çıqacaqmız. Biz ise qarmaq atıb, katırğa
ilişdirib onı şay çekmek istiymiz. Köziñi aç!
Yipek
yüzülüb zavallını daha aşağılarğa yuvarlandırmağaysıñ!
Asılı-temelinden
tüşünecek olsaq, bizniñ gazetde yazğan ve uzun çalışuvlarnıñ, tekşirüvlarnıñ
yemiş, özegi olmağan yazılarımıznıñ bir parça mekteb-medrese körgen bir adam
içün ne faydası olub olur? Yazğanımıznı halq añlamasa, oqub añlağanlarğa da bir
faydası olmasa, şay bolğanda bize tatarnıñ «çalğan da özi, oynağan da özi,
ikevi de budala!», degen sözine kelişmiymizmi?
«Kimniñ
yazğanını halq añlay, qaysı tilimen yazacaqmız?» – sorğusına qarşı bizge cevab
berecek doğrı, – halqdır. Lâkin, bunıñ içün gazetke yazıb aytacaqlarğa qaraycaq
olsaq, qarşımızğa kene bizim kibi bir qaç sohta ile bir qaç yazıcı-qırğıyçı
çıqacaqdır. Buña kelgende bu hiç bir zaman halq tüşüncesiniñ ölçüsi olub olmaz.
Biz halqı oqutub yazdırmadıq ki, sorağanlarımıznı oqub, añlab bizge qarşılıq
bersin. Bizden her qaysımız bir parça qalem tutmağa yarasaq, orus mektebinde
oquğanlar – orusçadaki, medresede oquğanlar – arabçadaki, İstanbulda oquğanlar
– osmanlıcadaki bilgisini ortağa töküb, maqtanmaq istiy. Şükür eteyik ki, başqa
memleketlerde oquğanlarımız pek az. Yarım yurtı biraz orusça bilgen iki kişimiz
bir arağa kelse, bir daha tatarcanı temiz unutalar. Arabiyat, türkiyatca
oquğanlarımız da şay. Zavallı halq o bir yaqda ağızını açıb qala. O, onlarnıñ
aytqan eñ aşağı sözlerini bile bir şiyler belleb susub, el qavuşub tura. Soñ,
o, onlarnı taşlab, hiç birisine de qulaq asmayıb öz arasında söyleşe. Halq
biri-birimen her şiy üstüne lafete, añlay, añlata. Onıñ tili bay, keñ. O, ücsiz
bir deñiz. Tek biz o deñizge tükürüb keçemiz. Ama, o da bizge mıyıq burmay,
onıñ özinde yazılı olmasa da, pek bay oruları, hazineleri var. O, onlardan saqlı
mallarını çıqarıb-çıqarıb besley, bu qadar yazı yazğanlarımıznıñ arasında
aytıñız, şindige qadar qaysı yazıcımız halqnıñ:
«Aygidi
menim öz köyim Subaş-Nayman,
Seniñ
közin torlansa, men cılayman,
Seniñ
közin torlansa, men cılayman,
Quş
uçurmay, töpekiden qorçalayman!» –
çıñnı
qadar yurtına qarşı olğan süygüsini, qıycılığını, fedakârlığını aytıb buldı? «Hadisat-ı
ictimaiye»den artıb oturğan qaysı bilgiçimiz çıqdı da halqnıñ:
«Anadan oğul tuvsa iyiki
(yahşı),
Ana colın quvsa iyiki.
Tuvğandan tuvmağan iyiki!» –
sözleri
qadar ata, yani ecdad, halq yer lisanı kütmek kerek olğanını, halqçı, milletçi
olmağan bir oğulnıñ varlığından yoqlığı daha yahşı oquğanını bunday açıq,
bunday qısqa, bunday temiz bir til bilen aytıb oldı? Halqnıñ tilinde,
tüşüncesinde olğan bu baylıqnı, bu ğüzelligi kim körmiy? Kim añlamay?
Anay-babaylarımız bizniñ qulaqlarımız tübinde bunlarnı her kün fısıldab
oturmaylarmı? Lâkin biz onlarğa ters qarab işitmek istemiymiz. Qulaq asmaymız,
bu altın bürtügi day sözler bizimen qulaqlarımıznıñ bir yaqından kire, o bir
yaqından çıqıb kite. Bugün qaysımız isterek, Ana tilimiznen yazmağa da yazıb
olamadıq! Biz de o halqnıñ oğulları tügülmizmi yoqsam? Biz istesek, onlarnıñ
oqumağanları halda bu qadar bay, güzel olğan şiylerni biz bilgimiznen, ince duyğularımıznen
daha bay, daha keñ yapıp olmamızmı?
Bizim
tilimizni unutqanmız «sohtanıñ tırmavuçını unutqanına» oşay, bassaq o bir ucına
añlarmız soñ, ama!..
Yoq,
yoq men bunı bilmeyuvdan, unutuvdan ileri kelgenini añlab olamayım. Kerçekni
aytayıq: biz onı, öz tuvğan tilimizni begenmiymiz, istemiymiz, biz «içinden
çıqıb da qabuğını begenmegen kestanege» oşaymız. Bir parça tüşünüb de
qafamızdaki ezberlengen şiylerni, tillerni çıqarsaq, tek öz tuvğan tilimizde
tüşünüb yazmaq istesek, içimizde yazamayacaq birevde tapılmaz, eger başqa
tillernen sırlanğanda halq añlamağanından – büyük, dep tanığan yazılarımıznıñ
boşlığından qorqmasaq!
Ana,
men bütün bu aytqan şiylerimni közge alıb, halqnıñ temel taşı olğan köyli
tilinde yazmaq istiymen. Köylini közge alğanda da her köyniñ ayırı-ayırı
laflarına, til putaqlarına urunmaq istemiymen. Ne tatça, ne noğayca yazam.
Bütün bunlarda güzel olğan ve hepisi tarafından añlaşılıb, her yaqqa keçib
olmaq içün özinde küç taşığan ortaca bir tilnen yazmağa çalışam. Men
tatarlıqnı ne day süysem, tatar tilini de şay süyem. Tilsiz bir millet – millet
tügüldir. Öz-özini añlamağan, yarım-yamalaq bir millet, diger qardaş
milletlernen hiç de birleşemez.
Men
Gaspralı qartbabayımıznıñ «Tilde, işde, tüşüncede birlik» qaidesini her zaman
köz ögünde tutam. Ve hepisi türk-tatar soyından olğan osmanlılar, Qafqaslılar,
qazanlılar, qırğızlılar ve daha bir çoq başqalarınıñ tilde birleşmeleri içün
tüşünem, tırışam. Men bu yolda şay oylayman.
Eger
bu tiller asılında-temelinde bir olsalar, biz onlarnıñ asıllarına-temellerine
doğrı kitsek, ille bir yerge barıb birleşirmiz. Eger bir olmasalar, til degen
şiy şay sozub ketirmek, zorlamaqnen birleşmez. Men onlarnıñ bir olğanına
inanam, lâkin başda bu til putaqlarında olğan güzel yemişlerni ayrı tımar etib,
asrab meydanğa ketirmek, tilimizdeki bütün baylıqnı çıqarıb köstermek, öz
aramızda yahşı añlaşmaq kerekdir. Ondan soñ, onlarnıñ birleşmesi içün yol
qıdırırmız. Men bunday yapılsa, aslı yol qıdırmaq da kerek olmaz, diymen,
onlarnıñ hepisiniñ tüsi, qoqusı, baş çizgileri bir olub çıqar. Lâkin şindilik
kitib bir putaqqa asılıb, oya yasab oturmaq [….] doğrı kerçekke, bilgige uyğan
bir şiy tügüldir. Bizniñ tilde şindilik türk-tatar dünyasınıñ hiç bir yaqında
soñ sözini aytacaq, soñı başdan kesecek daha bir kişi çıqmadı. Avrupalarnıñ
tikşirüvi, bilgisi de bu yolda pek eksik. Bizim içimizde orta qarar olsun bir
til bilgiçi yoq.
Keçenlerde
«Tatar dili ve edebiyatı» maqalesini yazıb doğrısı pek büyük bir qaruv,
cesaretle qarar bermek istegen Şamil Şevket efendi Şemseddin Sami-bekni türk
filologı, deb köstere «filologiya», «filolog» kelimelerini biraz tekşirib,
tübini, manasını qazıb baqacaq olsaq, Şemseddin Sami-bekin bu sözler arasında
hiç bir oşayış, beñzeyiş körüb olamamız. Şemseddin Sami-bek türkler içün pek
çoq çalışdı, büyük «Qamus-ül-a’lâm ensiklopedi» çevirib yazdı, bir qaç
fransızca luğatlar, bir-iki tiyatro oyunı kitabı, bir çoq şiylerge dair bir çoq
gazeta yazıları meydanğa ketirdi. Halq içün olğan faydasını tüşünsek, bilgice
pek az qıymeti olğan türkçe luğat kitabı da yasadı. Bütün bunlar pek faydalı
şiyler Şemseddin Sami-bek büyük bir millet hıdmetçisi olsa da, temiz bilgi
qatında onıñ sözi diñlenmez, hatta artılğan maqale ise seniñ sahibiniñ dili,
deb köstergen yerinde bile onıñ bir çoq eksiklikleri vardır. Bilgi onı pek az
tanır. Men pek yanam ki, bizde her şiy duyğularle, samimiyetle çevirilmek
istenile. Bir-iki kün evel Qırımlı birisidemi büyük türklikni ayırasın, deb
söge. Biz türk birligini küçlü, sarsılmaz temellerge baylamalımız.
Qafiyesiz, ahenksiz bir şirle, bir qaç saatda yazılğan bir qaç maqale ile
sorğu-ı tüyük çezilmez. Öyle «sen yaramaysın, bizni ayırasın, hainsiñ!» kibi
bir qaç sögüş yaki «canım etme, eyleme» kibi bir qaç yalqarışle abiş olub
bitmez. Hepimiz aynı milletke, aynı qalıbğa malikmiz, hepimiz onı seve,
qorçalamaq istiymiz, lâkin quru laf fayda ketirmez. Bilgige sarılmalı, halqın
olğan şiylerde, halqqa doğrı kitmelimiz, saqlamaq kerekmiy, bugün Anadolu,
İstanbul, Qırım, diger til putaqlardan hiç birisi adamaqıllı temelden, esasdan
tegişirib ortağa çıqarılmadı. Şay olğanda biz nasıl olur da şu putaq yahşı, bu
putaq terekde öz başı olur, deb aytıb olurmız, unutmayıq:
«Qudalaq
araba col bozar,
Azacıq
molla din bozar...» –
degen
de qartlar. Bu bir siyaset, yaki şarlatanlıq, şaplavuzlıq işi tügüldir, bilgi,
ilim işidir. O da bizden olmağandan soñ, bizim içün tutulacaq eñ birinci yol
bugün halq ille bu yolda temel taşı olğan köyliler qaysı til putaqnı daha çoq
añlab qullansa, qaysı til putaq türk-tatarcağa daha yaqın olsa, bizge de
bunıñle yazmaq kerekdir.
|