İki-üç künden berli bir çoq haberler çıqarılmaqda, ortalıqda bir çoq işler olayatmaqdadır. Tünevinki nüshamızda bolşeviklerniñ kelmek ihtimalı üzerine Aqmescidde olğan işlerni, verilgen qararlarnı yazğan edik. Bugünge qadar ahvalda bu deñişiklik körülmedi.

Bir yaqdan çıqqan haberler bolşeviklerniñ artda quvulğanını ayta. Lâkin resmiy bir suretde ne tarzda olğanı henüz belli dügül. Her halda Qırımnıñ tar boğazında qanlı, büyük cenkler olmaqdadır. Bunlar belki bir qaç künge qadar añlaşılır. Lâkin bugün ne de aytılsa, tek bir oylanuv ve tasarlanuvdan ibaret olub qalacaqdır.

Fransızlarnıñ Qırımnı işğal eteceklerine Qırımğa bolşeviklerni cibermiyeceklerine, ve şindilik kirseler bile bir qaç vaqıt soñ quvub çıqaracaqlarına dair olğan haberler bu künlerde sıq-sıq aytılmaqdadır. Bu soñki haberniñ doğrı olmaq ihtimalı da vardır. Lâkin bunıñçün de biraz beklemek kerekdir. Çünki Avrupanıñ öz içinde neler ola ve Sovet Rusiyesi ile Avrupa halq tüşüncesi arasında ne kibi bir rabıta vardır, bu bilinmegence bu hususda kimiñ bir söz aytmaq mümkün dügüldir.

Velhasıl Qırımnıñ olğanı kibi bütün dünyanıñ baş yasısı da daha oqunamamaqdadır. Dört-beş yıllardan berli uzanib kelgen belgisizlik kene devam etib kite. Bilhassa siyasiy yaşav iplerini qıbırdatqan eller bizden pek uzaq olğanı içün bugün bizim Qırımımız da oturub da perdeniñ artında olayatqan şiylerden fal açmaq doğrı dügüldir. Biz qırımtatar içün bugün eñ birinc iborc her qaysı bir halda olursa olsun öz milliy, medeniy ve işleklik işlerimizge çalışmaq ve mümkün olğanı qadar bitaraf bir yol tutmaqdır.