1918. – № 151. – Noyâbr 17; № 152. – Noyabr 18. — Toqta, toqta.., toqta canım, saña aytacaq şiyim bar. O, toqtamadı, elini sallab yiberdi, adımlarını daha ziyade sıqlaşdırıb çapmağa başladı. Maña onıñnen mutlaq körüşmek kerek edi. — Ey... aqam, meni tanımadıñmı yoqsam? Toqtasa biraz, seniñmen körüşmek istiymen!.. deb bağırdım. Lâkin o bu sefer artına bile aylanıb qaramadı. Kitken sayın adımlarını sıqlaşdırmağa başladı. Men, «delirdimi bu adam?» deb artında çapmaq içün hazırlanıb yatqan bir zamanda o bir yaqdan bir adamnıñ daha çapıb kelgenini kördim. O biraz soñ yaqlaşdı. Bu da bizim tanışlardan, men bundan işini añlarman, deb biraz bekledim. O iki daqiqa soñ maña yaqlaşqan edi. Men bunıñ ortasına taba keçib oturdım, o meni körgeni kibi abdırağan tavşan day yolnıñ o bir kenarına çıqıb başını sallab selâm berdi. Soñ, ay meded meni lafqa tutar degen day, şu saat başını o bir yaqqa çevirib çapmağa başladı, men kene, — Toqta, toqta aytacaq şiyim bar, deb bağırdım. O elin-melin de sallamadı, börüden qorqqan qoy day cuvurmağa başladı. Men bundan bir şiy añlamay, bularnıñ neden qaçqanlarına aqıl erdirib olmay, şaşıb qalğan edim. Şindi poyezdnen yürümekniñ nasıl belâlı bir şiy olğanını birilsiñiz, men bu zahmetlerni közge aldırıb sırf bu adamlarnen körüşmek içün ta Aqmescidden mında kelgen edim. Şindi daha şeherge kirmezden evel bütün arqadaşlarnıñ taşlab qaçqanını körgende mutlaq şeherde bir şiy bardır, deb başımı qaşıb oturğanda şeher yaqından briniñ daha kelgenini kördim. O da çapa edi, yaqınlaşdı, o bu bir apaqayğa oşay edi, yahşı baqdım, menim tanış muallimelerinden birisi, bu sefer yolnıñ tam ortasına keçdim, eger bu da qaçacaq olsa zornen toqtatmağa qarar berib o suretle pazitsiya tutdım. Muallime hanım bunı seziksiregen olsa kerek, maña beş-on adım qalğanda başını sallab selâm berdi, soñ, — Siziñnen körüşmek ister edim. Amma şindi işim var, birazdan men şeherge kelecekmen, o zaman körüşirmiz, deb keçib kitmek istedi, men bunıñ bir aynecilik olğanını añlab, — Yoq, dedim, men sisiñnen şindi körüşmek istiymen. Ve cevab beklemeyib oña yaqlaşıb elini tutdım. Kim bilsin qaysı büyük tesirlerniñ astında bu qadar aşıqıb kitken bu zavallı, yolıñ ortasında bunday toqtatılub qalğanını körgendenmi, nedendir, birden birge bala day ökürüb ağlamağa başladı. Men bu hal qarşusında onı tutqanıma peşman oldım. Bıraqayım kitsin, deb elini taşlamaqnı tüşündim. Lâkin bunlarnıñ neçün şay, şeherni taşlab qaçqanlarını ögrenmek arzusı yüregimi tırmalay edi. Bunıñ içün elini daha ziyade sıqmağa başladım. O menden qanlı yaşlar töküb yalvardı. Men oña, — Canım, dedim, dünya tutuşub yanğanı yoq ya, elhamdüllillâh, men Aqmescidden keldim, anda bir şiy yoq, mında keldim her kes taşlab qaça bu nedir? Muallime hanım köziniñ yaşlarını silib, — Ey-y... dedi, men çapmayım da kim çapsın, bizim Milliy İdareniñ Maliye ve Evqaf şübesi B... vekil Aqmescidke kiteyata... Muallime hanım yañıdan ağlamağa başlamaq içün hazırlana edi, — Ey, dedim, kitse, kiter da. Bugün kitse yarın kene qaytar kelir, bunıñçün bu qadar ağlamanıñ ne lüzümi var? O köküs keçirib, — Ey, dedi, siziñ içün şay da, soraçıñız menden!.. Muallime hanımnı Milliy İdareniñ Maliye şubesi B... şeheri vekiline aşıq, olğandır bellegen edim, lâkin onıñ laflarından işniñ başqa dürli olğanını añladım. Meger keçenlerde terbiye ocağında balalarğa […] oyun ögretkende sınıfnıñ töbendeki töşemesi (polı) birden birge olğanı kibi teşilgen kitken, iki muallime bilen yigirmi doquz qadar balanıñ hepisi özlerini birinci qatnıñ podvalında körgenler. Endi, elhamdülillâh hiç birisiniñ burını qanamasa da, podvalda qapalıb qalğanlar. Ne ise olğan şatırdını işitib yardımğa çapqan balalarnıñ ana-babaları qapunı parlab balalarnı çıqarğan, muallimelerini de «Neçün bunday çürük mektebde oqutub bizim balalarımıznıñ başını belâğa soqasıñız», deb qarğamağa başlağanlar. Muallimeler de: — Canım, bizim idareniñ küçi bu qadarğa yete, siz de balalarıñıznı tüşünüb biraz yardım eski toylarda raqı, şarab peşine, yaldızlı çıraqlar içün biñlerce sarf etken paralarıñızdan beş-on kümüşler ayırub yahşı bir mekteb tutqay ediñiz da, deb haqlarnı yatışdırğanlar. Soñ şu saat maarif vekiline varub işni añlatqanlar, o iki-üç kün soñ kelib mektebni baqqan, iki-üç kün soñ da Maliye Şubesi vekiline bildirgen, Maliye Şubesi vekili da iki-üç kün soñ Maliye müdirligine işni añlatıb mektüb yazğan, Maliye müdiriniñ başqa bir mekteb baqılıb tutulması içün yazğan mektüb poştalarnıñ işlemememişinden üç-dört kün qadar eglengen. Ne ise «Keç olsun, küç olsun» deb muallime hanımlar başqa bir mekteb tutqanlar, kirasını istemek içün Maliye vekiline varğanlar, o da men emir aldım sizge para berecekmiş, lâkin yarın keliñiz, deb muallime hanımlarnı qaytarğan, bugün ise onı Aqmescitke çıqıb kitken, ana muallime hanımnıñ aşıqmasınıñ sebebi bu eken, o tutulğan quş day ğaribsinib menim közime baqdı. — Şindi kitken olsam, belki onı istansada tapar edim, dedi; Men balaban bir qabahat işlegenimni añladım. Şindi bunı nasıl qapatmalı, deb tüşünüb yatqanda qarşıdan bir araba kelgenini kördim. Ögine çıqıb toqtatdım. İçinde tek bir adam vardı, o, — Canım, menim acele işim var, tez kitmek istiymen, deb açuvlandı amma. Men cöbimdeki altı kapigimi eline alıb, soruv, sualsiz muallime hanımınen birlikde arabağa sıçradım. Arabacige de «tez ayda» emirini bergenden soñ arabadaki tatar aqaynen tanışdıq. O da muallim eken, men, — Bu qadar, ne aşıqasıñız ya? deb soradım. Meger o zavallı da iki-üç aydan berli maaşnı alıb olamay eken. Milliy İdareniñ Maaliye Şubesi vekili bugün-yarın, deb söz berib otura eken, bugün sabaqdan turub paralarını alıb Aqmescidke kitken, muallim efendi de onıñ artından yolğa tüşken. Beş-on daqqa soñ biz istansağa kelgen edik, onlar arabadan sıçrağanları kibi vağzalnıñ içine daldılar. Araba parasını pergenden soñ men de onlarnıñ artına tüşdim. Bütün vağzalnı qıdırıb çıqqan edim, hiç bir yaqda tapalmadım yoqsam poezd rast kelib bunlar minib kitkenlermi eken, deb soraşdırğanda poyezdniñ yarım saat evel kitkenini ögrendim. Bunlar mutlaqa bir köşede cıyılıb qalğandırlar, deb istansiyanıñ yanındaki kiçkene bağçaçıqqa bir köz taşladım, anda köşedeki iskamilerden birisinde sıqışıb oturğan bir top adam kördim. Bizim barabar keldigimiz muallime hanımnen muallim efendi, yolda tutub olamadığım B.....niñ medresemi, mektebmi ne de olsa eñ yüksek oquv yurtunıñ başı efendi rüşdiye mektebniñ başı, ve onlarnıñ yanında yolda koramadığım ocalar mektebi ile başqa bir qaç mektebniñ başları daha otura ediler. Bunlarnıñ hepisi başlarını aldına asqan, deren tüşüncelerge dalğan ediler. Uzaqlardan bergen selâmı kimse işitmedi. Yanlarına yaqınlaşıb biraz öksekçe bir tavuşnen, — Arqadaşlar ne bu qadar daldıñız, hayır ola!.. deb qıçırdım. Toluşub-toluşub birden birge yağğan yağmurday onlarnıñ hepisi bir ağızdan, — Ya kitdi da!.. dedi, soñ hep bir kereden ökürüb turub ağlamağa başladılar. Altı-yedi dane esli başlı kişiniñ hep birden toplanıb ağlamalarını körmek meni pek ziyade muğayta edi. Bu pek acınıqlı halnı körmekdense ölmege pek razı edim. Ne yapayım, elimden ne kelib olur, bu adamlarğa nasıl bir yardım etib olurım? Men bu sorğularnıñ astında ezilib otura, ne yapmağa bilmi şaşıb qalğan edim. Onlar ise cöblerinden yavlıqlarını çqarıb sel kibi aqqan yaşlarını sürte ediler. Men özimi cenaze ozğarğan bir tögerekde day köre, yürekleri yaralı bir zavallılarnıñ ne day da bolsa köñlilerinialmaq kerek olğanını tüşüne, lâkin niyaqdan başlamaqnı bilmiy edim. Eñ soñı, — Ne yapayıq, arqadaşlar, qartlarımız kitkenniñ artından kitilmez, ölgenniñ atından ölünmez, degenler. Sabır eteyik siz, elbet Cenab-Allah bunıñ bir ahırını berir... deb devam etecek edim, lâkin birden birge ortada cenaze, olmağanını, işin tek bir Maliye Şubesi vekili üzerine olğanını tüşünüb lafın tüsini deñişdirdim, — Canım, dedim elimi sallab, iş tek bir vekil üstüne qurulğan tügül ya, vekil Aqmescidke kitken olsa siz de kiter, hazır Maliye ve Evqaf Şubesi vekili yerine, Maliye ve Evqaf müdiriyetiniñ özini körür, işni añlatırsañız. Bunıñ içün bu qadar ağlamanıñ ne lüzümi var?!. Eñ yüksek oquv yurtınıñ başı olğan efendi köküs keçirib, — Ey, dostım, dedi, iş seniñ tüşünmege kör. Şay da ya soraçı sen bizden. Bugün tam yigirmi sekiz kündir, iki-üç yuz qadar talebe, yedi-sekiz ocanı keçindirmek içün dudağımda qan qalmadı, baş urmağan qapu, yüz sürmegen kişi taşlamadım. Şindi şaqa tügül, bu qadar adamnen beslenmesi nege çıqa, bilesiñmi sen?.. ocalar bir yaqdan cıyılıb qalğan paralarını bermekçün zorlay, şakirdler açmız, deb bağıra, tükânlar artıq biz sizge borçqa mal bermiymiz, deb hesab istiy, ehali ise külüb keçire saruşlıqdan, spekulâtsiyadan köz açmayıb da bu işlerge qulaq asmay mektebniñ başında men oturğanım içün her kes maña kele başqa kimseni tanımay, bu hal içinde kündüzleri İşpan hastalığınıñ sıcaqlığından daha yaman bir qızğınlıqnen dolaşa, kiceleri bastırıqlı, albastılı tüşlernen sabahnı tapqance qusqunım qurıy. Tamam on altı kün var. Medrese içün on biñ kümüş berilsin, deb aqmescidniñ yüksek bir toplanışında qarar çıqarılğan edi. Bu vaqıtqa qadar bekliymen. Bizim Maliye Şubesi vekili de emir alğan berilsin, deb kereler kitem, bugün berermen, degen edi, şindi ise paralarını alıb Aqmescidke kitken. Sen Aqmescidke barıñız, diseñ eger Maliye Şubesi vekiline barabar barğan olsaq ne ise, o varıb paralarnı kassağa teslim etken soñ, zar ondan bir daha para almaq mümkün ola. Biz varğance qadar onıñ qoqusı bile qalmaz. Soñ kine boş avuçnen qaytıb kel!.. Eñ yüksek mektebniñ sayğılı başı bu yerde kelgende ellerini avuçları içine alıb, — Ah, ya Rabbim, bu çekilecek dertmi, men el-alemge qarşı nasıl bir yüznen çıqarım, dedi, kene ökürüb ağladı. O bir yaqdan o bir muallimler, mekteb başları da oña qoşıldılar. Menim başımdan aşağı qaynaq suvlar tökülmege, yüregime sanki bolşevik qancerleri saplanmağa başladı. Menim daha tuvğandan berli bunday putraqlı, bunday müşkil bir halda tapılğanım yoq edi. Bu ağır, can ezici körünişniñ qarşısında artıq turalmayacağımnı añladım. Lâkin bu zavallılarnı şayna, yol ortasında taşlab kitmek de toğrı tügül. Elimden başqa türlü yardım kelmese de, hiç olmasa bir qaç tatlı söz aytıb köñüllerini eglendireyim, deb tüşündim. — Arqadaşlar, dedim, millet sizni taşlasa, Milliy İdareniñ sizge baqmağa vaqtı olmasa da milletni yaratqan, milletni sürükleb alıb kit, deb Milliy idarelerni yoqdan var etken varlıqlarnıñ varlısı Tañrı-Taalâ hazretlerinden ümüt kesmek olmaz. Maña qalsa, aydañız, bu yerçikde köñüllerimiz her türlü günâhlardan yıqanıb temizlengen bir zamanda Ulu Tañrığa avuç açıb dua eteyik. Menim bu sözlerim, yüreklerinde başqa türlü dayanılacaq bir noqta qalmağan bu kişilerge pek yahşı tesir etdi. İçlerinden qartça bir muallim ellerini köterib duaya başladı: — Ey, yer köknen barabar bütün halqlarnı ve bütün halqlarnen barabar biz ocalarnı da yaratqan Ulu Tañrım, Sen bizim halımıznı körüb bizge acı, merhamet et. Köresiñ birimizniñ çırayında bir tamla qan yoq. Üst-başımız yırtıq-pırtıq, balalarımız aç, şakirdlerimizge ders berecek küçümiz yoq. Bu işni çoqdan taşlab qaçacaqmız, lâkin qaçsaq millet de söge. Dört tarafdan yolımız qapalı, her yaqdan çıtırmanlıq içindemiz. Ya Rabbim, Sen bizge doğrı, açıq bir yol köster, ya Rabbim, sen bizge merhamet et!.. Her ağızdan çıqqan hararetini, sıcaq «Amin!»ler köklerniñ buz bulutlarına varıb qarışa edi, ocalar, mekteb, medrese başları dalğan, duağa qarışıb özleri dua kesilgen ediler. Bu arada poyezd kelib toqtadı. Men yavaş kimsege bir şiy aytmadan aralarından çıqıb vağonğa atıldım. Poyezd köçken soñ vagonnıñ penceresinde men onlarnıñ halâ dua itmekde olğanlarını kördim, yürekden «Amin» deb ayta, ayta bu suretle B... şeherine kiralmadan kene meydana qaytıb kelem. **** O bir kün bunlarnı kelib maña añlatqan arqadaşalrımdan birisi, bu suretle ertegesini bitirgenden soñ, — Canım, dedi. Sen Maliye ve Evqaf Şubesine varıb bu hallarnı añlatmasañ, belki onlar bir çaresini tapar ediler. Menim de bu hikâyeden yüregim temiz iriyib kitken edi. — Pek yahşı! deb Maliye ve Evqaf Şubesine cuvurdım, bunlarnı añlatqandan soñ, — Buña qarşı ne yapıb olur ekensiñiz? deb soradım, — Ne yapayıq, ne bileyim!.. deb cevab berdiler. […] şay bolsa men bunlarnı gazetke yazarman belki başqa bir çaresi tapılır. — Yazsañız yazıñız, yalıñız kassada para var, deb yazmañız da...
|