1917. – № 140. – Dekabr 30.

 Sevastopol Harbiy İnqilâb Komiteti Qırım Askeriy Ştabına müracaat iderek, Közleve topçı qıtaatınıñ nesebiye-i mebni silâhları alındığını sormış ve alınan silâhların keri virilmesini ultimatum ile talab itmişdir. Qırım Askeriy Ştabı ultimatuma cevab olaraq aşağıda mezkür müracaatnameyi neşir itmişdir.

Qırım Askeriy Ştabınıñ müracaatnamesi

Sevastopol Harbiy İnqilâb Komitetiniñ Közleve garnizonınıñ silâhları alınmasınıñ qat idilmesini talab itmesine qarşı ultimatumda serd olınan qaziye ve fikrileri red ve tekzib iderek, Qırım Hükümet Harbiyesi vekili müftiyle ilân idiyurım:

1. Evelâ tatar Parlamentosıyle tatar milliy hükümeti tarafından tesis olınan Qırım Askeriy Ştabı Qırımda eñ aliy harbiy idare sayılub, halq vekilleri Şurası ve Odessa Harbiy Dairesi tarafından tasdiq olunmışdır. Yoqsa Sevastopol Harbiy İnqilâb Komitetiniñ iddia itdigi kibi, yalıñız tatar milletiniñ harbiy hükümeti degildir. Sevastopol Komitetiniñ bundan milliy bir ğavğa çıqaracağı iddiası da doğrı degildir. Binaenaleyh, Sevastopol Harbiy İnqilâb Komitetiniñ talabınıñ esası – Qırımda hükümet-i harbiyeniñ teşkilâtını bilmemekden neşet idiyur, ve binaenaleyh, hükümden saqt olıyur.

 2. Yine bu sebebe binaen, Sevastopol Harbiy İnqilâb Komitetiniñ qan dökmekden qorqdığı da esassızdır. Qırım Askeriy Ştabınıñ Közlevede bulınan silâhlardan bir taqımını Aqmescide naql itmek teşebbüsi, Közleve garnizonınıñ silâhını almaq almayub bir skladdan diger sklada silâh naql itmekdir ki, bu da Sevastopolde vuqua kelmekde olan vahşiyce qan dökmelerden Qırım ehalisini hıfz itmek lüzümine mebni merkeziy Radanıñ, Qırım halq vekilleri Şurasınıñ, Aqmescit amele ve asker vekilleri Şurasınıñ, Odessa Harbiy Dairesi nezdinde bulunan Rada vekilleriniñ «Volâ» zırhlısınıñ muvaffaqat ve müsaadeleriyle icra idilmişdir. Binaenaleyh, ehaliniñ ve demokratiyanıñ arzuları hilâfete, milletler ğavğası, qan dökülmek qorqusı kibi sözlere de mahal yoqdır. Sevastopol Harbiy İnqilâb Komiteti, Qırım Askeriy Ştabı Közleve garnizonını silâhdan tecrid itmekle itham iderken, silâhları Közleveye naql idilen aqsam-ı askeriyeniñ haman yoq derecesinde oldığından hiç bahs itmiyur. Halbuki, Birinci Ukraina batareyasında yalıñız iki zabitle bir çavuş bir de kapitan-armus, tarassud mektebinde yigirmi askerle az miqdarda zabit qalmışdı. Tertibatları tam olan Birinci ve Altıncı Sahil Batareyalarıyle, Sahil Qarağul Bölügi ise, bütün silâhlarıyle oldığı kibi bıraqılmışdır.

3. Sevastopol Harbiy İnqilâb Komitetiniñ qan dökmeyi qat itmesi ise, pravokatsiya tabiatına haizdir. Çünki Qırımda qan dökülen bir yer var ise, o da Sevastopoldir. Başqa bir yerde degil. Qırımın başqa yerlerinde Qırım Askeriy Ştabınıñ faaliyeti sayesinde istirahat ve asayiş kemalinde ve ehaliy huzur ve istirahatdadır.

4. Sevastopol Harbiy İnqilâb Komitetiniñ Közleve yalılarınıñ silâhsız ve müdafaaasız qaldırıldığı haqqında davası da doğrı olmayub, açıqdan açığa yalandır. Silâhı alınanlar Tayare Tarassud Mektebi olub, bunların her ikisi de Merkeziy Radanıñ emiriyle ukrainlaşdırılacaq ve yanvar başında faaliyetlerini qat idecek ve dağıdılacaqlardır.

5. Közleveden silâh naql idilmesine bütün Sevastopolin hiddet itidigi de açıq yalandır. Bir avuç qatiller tarafından tedhiş olınan Sevastopol bütün ümid-i nazarlarını Qırım hükümetine ve halq vekilleri Şurasına dikdikden mada, flotın eñ quvetli gemilerinden biri olan «Volâ» zırhlısı da 24 dekabrde Közleveden Aqmescide silâhların naql olunmasına muvaffaqat itmişdir.

 6. Bütün Qırım demokratiya ve ehaliy müdafaa ve muhafaza noqta-i nazariyeni mülk-i ittihaz iden Qırım Askeriy Ştabı. Bunların arzusını icra iderek, şimdiden soñra da Qırımın istirahat ve emniyetini muhafaza oğurında çalışmaya qatiyen azm itmiş oldığından açıqdan açığa ilân ider ki, bütün Sevastopoli tahavvüf ve tedhiş iden ve bütün Qara deñiz flotını qıymet-i harbiyeden düşüren bir avuç vicdansızların Qırım Askeriy Ştabını itham itmeye haqları olamaz. Qırım Askeriy Ştabına virilen ultimatum ve tehdid – Qırımın bütün ehalisine qarşu tehdid, qanlı hadise meydana ketirmek içün atılan yeñi bir adım, yeñi bir qan içmek arzusından başqa bir şey degildir. Lâkin bilmelidir ki, ittihad sayesinde quvetini muhafaza iden ve Sevastopol hadiseleriyle hiddet ve tehevvüre kelen Qırım halqı her tarafda kendilerini müdafaa içün yekvücud olaraq, qıyam idecekler ve Sevastopol ğasbları, Qırım halq aleyhine silâh qaldırdıqları saat, hasıbların kendileri içün dehşetli bir saat olacaqdır. Qırım milletleri azmlerinde qatiydirler. Binaenaleyh, anların mübarezeleri de sarsılmaz bir azm ve şiddetle olacaq ve bir danesi mahv olursa, yerine dikeri qaim olub onıñ intiqamını alacaqdır. Qırım askeriy Ştabı bütün yazdıqlarımıza Sevastopol Harbiy İnqilâb Komitetiniñ nazar diqqatını celb iderek, ilân idiyur ki, demokratizm esası üzerinde sarsılmaz bir azm ile sabit olan ve memleketin siyasiy, iqtisadiy ve ictimaiy hayatlarda esaslı islâhat icrasınıñ bir lüzüm tarihı oldığına ve hiç bir vechle teehhür caiz olmadığına qani olan Qırım Askeriy Ştabı, Sevastopolde aqıl ve muhakemelerini ğaib itmiş olan bir avuç, qardaş qatilleri tarafından tatbiq itmek istenilen, qanle mesele-i hal itmek usulını hiç bir vechle tecviz idemez. Qırım askeriy Ştabı, şeref aqıl ve fikirle temayüz iden ve medeniyet ve umranı meydana ketiren beşeriyetin büyükligini ve qıymetini pek eyi taqdir itdiginden Qırım inqilâb tarihınıñ şanlı sahifelerini soñki Sevastopol qanlı hadiseleriyle lekeleyen bir avuç mesuliyetsiz bağillerin[1] yapmaqda oldıqları tahribata lâqayd qalamaz. Qırım askeriy Ştabı, her nerde olursa olsun Sevastopol qanlı hadiseleri tekrar iderse, her haqiqiy demokrat ve inqilâbçı içün menfur olan bu hadiseleri elde olan bütün vesaita basdırmaya, söndirmeye ve insanların hayat ve şahslarıyle oynatmamaya çalışacaq. Ve süngüleriniñ keskinligine güvenerek, irtica ve istibdadın yeñiden temel atmasına, inqilâba ve halqın asırlarce ıstırablar ve azablar neticesinde nail oldığı islâhata mezar qazmaya çalışan bu insan avcılığı qahramanlarına qarşı duracaqdır. Millet islâhatı, asırlardan beri mahkemesiz, teftişsiz adam avcılığı iden ve Sevastopol cellâdları suretinde temsil iden inqilâb mezarcılarından degil. Bütün Rusiyeniñ eñ eyi adamlarından, sağlam dimağlarından ve ıstırab ve zahmet çeke, Rusiyeniñ qalbinden bekledi ve bekleyur. Qırım askeriy Ştabı hiç bir dürlü mania öginde tevqif itmeyerek, memleketi mahalliy meclis-i müessisannıñ ictimaine qadar alub kitmeye bütün quvetiyle, bütün vesaitıyle çalışacaqdır. O, meclis-i muessesan ki, Qırım milletleriniñ haqiqiy arzu-maqsadlarını meydana qoyacaq ve siyasiy, iqtisadiy ve ictimaiy meseleleri, süngü ve qurşuna ve zabit kisvesi taşıyan insanların canını almaqle degil, milletin müntehabları ağızıyle, milletin kendi reyi vastasıyle hal idecekdir.

[1]İsyancılarnıñ