1917 senesi inqilâbtan berli Qırımda tatarlar arasında teatro işlerini tiriltmek, edebiy bir sahna yaratmaq içün bir çoq defalar teşebbüsler olğan edi. 1921-bcı senesinde Aqmescitte halq maarif komissarlığı tatar şubesi yanında bir teatrocılıq mektebi açılmış ve bir de tatar truppası teşkil olunmış ise de birincide bu husustaki maddiy cehetiñ zayıflığınından, ikincide böyle bir teşebbüsi meydana ketirecek hazırlanmış işçilerniñ olmamasından, üçüncide ve eñ ziyade ehemmiyetli olaraq sana edebiyatınıñ faqırlığından dolayı bütün bu teşebbüsler hep neticesiz qalıp kelmekte edi. Bu sene maarif idaresi tarafından Qırım tatarları arasında sahna meselesini tiriltmek içün oldıqça ehemmiyetli bir para ayırılmış ve bu işte çalışacaq adamlar çağırılmıştır. Birincide bütün Qırımdan sahna işlerinde eñ ziyade lâyıqatlı ve istidatlı arqadaşlar ve rus dramstudiyası yanında tatar bölügi açılacaqtır. Truppanıñ başında Qırımda eskiden berli sahna işlerile pek yaqından alâqadar olan Celâl Meyinov ve Qazan tatarlarından sahna mektebi ikmal itmiş Baykin arqadaşlar çağrılmıştır. Truppağa her okrugdan birer, ekişer arqadaş çağırılacaqdır. Keçenlerde toplaşmış olan maarif komissarlığı tatar mesül işçileri toplaşuvda okruglardan şu arqadaşlar közde ilinmiştir:

1. Umer Fehmi İpçi,

2. Hasan Çergeyev,

3. Emine Çelebiyeva,

4. Ayşe Tayganskaya ve ilh.

Bulardan başqa, bu mesele ile alâqadar olğan bütün arqadaşlar okrugdaki istidat ve tecribeli sahna işçilerini maarif komissarlığını tatar şubesine bildirirlerse intihab istifasında onlar da nazar itibarığa alınır edi. Truppa şindilik on kişilik olaraq teşkil olunacaq ve onıñ bütün azaları temin olunacaqtır. Öyün, balet işlerini idare itmek içün Hayri Emir-zade arqadaş çağırılacaqtır.

Sahnanı yükseltmek içün truppadan başqa asıl ve birinci olaraq sahna edebiyatı da hazırlamaq kerek olğanından maarif komissarlığı bu hususta bütün tatar yazıcıları arasında konkurs (raqabet) ilân etecek ve qırımtatar yaşavınıñ közge çarpqan müsbet ve menfiy bir çoq cehetlerini közge alıp, sahna edebiyatı meydanğa ketirmege teşviq etecektir. Konkurs şartları yaqında gazetalar vastasıle ilân olunacaqtır. Yazıcı arqadaşlar bu hususta şindiden hazırlana bileler. Eñ ziyade istenilgen eserler komedi, drama ve operettalardır. Bunlar halq tarafından añlaşılacaq ortaca bir şivenen yazılmaq kerektir. Qırımtatar sahnasını yükseltmek işinde ameliy kösterüv ve tüşünceleri olğan arqadaşlarnıñ maarif komissarlığı subesine yazmalarını rica ideriz.