Большевик акимиети куньлеринде бизлер ичюн дуа этмек, Пейгъамберимизни анъмакъ ясакъ эди.

Алланы, Пейгъамберни инкяр эткен, минарелерни йыкъкъан, джамилерини ат, сыгъыр аранына чевирген, худдамларны эляк эткен большевиклер бизим Ислям халкъы ичюн айырыджа бир беля олгъан эди.

О заманда большевиклер тарафындан тешкиль этильген Алласызлар иттифакъы, Алласызлар эдебияты, клублар ве саирелер булар джумлеси бизим динимизни гъайып этмек, Пейгъамберимизни унуттырмакъ ве етишип кельген яш несильге озь динни ве миллетини танытмакъ макъсадыны куте эдилер.

Бугунь озь диний ве миллий азатлыгъына наиль олгъан халкъымыз Мевлюд кунюни бутюн манасынен иджра этти. Бу акъшам бутюн шеэрлерде ве койлерде Комителеримиз бутюн манасынен тантаналы акъшамлар тешкилятландырдылар. Бу тантананынъ ёл башчылары табиатынен худдамлар ве муаллимлер олдылар.

Мевлюд айында худдамларымыз Ресюлимизнинъ терджюме-и алыны, япкъан ишлерини, дженклерини, сиясий, ичтимаий ве икътисадий джеэттен джемаатларгъа тавсилятлы суретте анълатырлар.

Земан саадетте Пейгъамберимизнинъ омрю бир софунынъ, яхуд шейхнинъ омрю киби дегиль де, бутюн манасынен гурьдели сиясий, икътисадий, ичтимаий адиселеринен толу бир яшайыш олгъаныны халкъларымыз бильмек керек.

Мевлюд айында худдамларымызнынъ сёйлееджеги ваазлар эм къувандырыджы, эм де агълатыджы нурлу сёзлерле толу бир вааз олмалыдыр.

Бу хусуста озь натыкъасына ишангъан худдамларымыз сёйлеген ваазларнынъ айныны идаремизге ёлласалар, о ваазларны Акъмесджит джемаатларына радио вастасынен сёйлер, газетамызгъа дердж этер эдик.

Бу ваазларны эрлернен берабер къадын ве къызларымыз, хусусан етишип кельмекте олгъан генчлеримиз динълемек ве эшитмек керектирлер.