Aqmescidde, Dvorânskiy soqağında «Qırımtatar gençleriniñ klubı» namında bir klub açılmış idi ki, bu klubın eñ birinci maqsadı – tatarın pek artda qalan maarif, medeniyet ve sanat yaşavına hıdmet itmek, müslimanların teraqqi ve temeddünine çalışmaq, ara-sıra aqşamlar, kontsertler yaparaq, tatar halqlarınıñ fikirlerini açmaya ğayret itmek ve klub yanında hususiy bir kitabhane açaraq, oqumaya havesligi olan gençlere kitablar virmek ve saire idi.

     Sudaqdan, Kefeden hususiy suretde aldığım bir-iki mektübda refiqlardan bir-iki efendi Qırım Aqmescid «OSVAG»ına bazı bir tercimeler yazub köndermiş oldıqlarını beyan ile beni, «istediklerine binaen» guya, «OSVAG»da resmiy mütercim zann iderek, tercimeleri ve yolladıqları şeylerin basılacağı hususlarında kendilerine malümat virmemi ve lüzumiy suretde o yolda kendilerine «dil yardımda» bulunmamı «can ve göñülden» rica idiyurlar.

     Hayatın eñ muqaddes noqtalarına balta uran bölşevizma kendi kommunasıyle meydana çıqaraq, bizim aqide ve ahlâqımızı temelinden sarsdı. Ve bize infiradcılıq, muhafazacılıq, tabiatçılıq, ictimaicılıq ve saire kibi bir taqım ahlâq hastalıqları yumurtaladı ki, bu künde körüşdigimiz bir hayli gençler, ahlâqiy ve diniy sanat kibi beşer-i müesseseler, sunniy şeyler, diye zum idiyurlar.