1917. – №
103. – Noyabr 13.
Eski idare devirinde ğayr rus milletlerin her işine
fena közle baqılub, onların eñ masum hareketleri bile su-i tefsire oğrardı.
Mekteb açsalar, ana esasında ders virseler, milliy dilde kitab ve gazeta neşir
itseler, milliy, diniy ve medeniy huquqlarınıñ tanılmasını dileseler haman
onların «separatist» oldıqlarına hüküm idilerek mektebleri qapadılıyur.
Muallimleri süriliyur ve qatiy bir tarassud altında bulundırıyurlardı.
Vaqtaki hürriyet keldi, vaqtaki «Hür millet kendi
işini kendisi idare itmelidir!» şiarı ilân idildi. Hürriyete qadar
mahkümiyetler,huquqsızlıqlar içinde yaşayakelmiş milletlerden her biri kendi
milliy emellerini yaşatmaya qalqışdı. Bu cümleden olaraq qırımtatarlar da kendi
idarelerini kendi qollarına alaraq diger milletlerden her biriniñ huquqına
hürmet ve riayet itmekle beraber kendi işlerini kendisi idare itmeye başladı.
İnqilâb ve hürriyetin umume bahs itdigi yuqarıda şiardan o da istifadeye
çalışdı. Komite teşkil itdi. Mahkeme-i şeriyesini islâh ile evqaf idaresini
eline aldı. Başqa milletler kibi o da milliy asker alayları teşkiline teşebbüs
itdi.
Onıñ bu teşebbüslerine de eski idaredeki kibi başqa
renk, başqa şekil virilmek istenildi. «Tatarlar hanlıq qurmaq, diger milletleri
esir itmek Rusiyeden ayırılmaq ve daha bilmem ne yapmaq isteyurlar» dinildi.
Komiteniñ bütün işleri bir tarafdan eski idareniñ bıraqdığı mirasdan henüz
qurtulamamış memurların ğayretiyle Qırımın müntehab müftisi tevqif olundı.
Komiteniñ naşir efkârı olan «Millet» gazetası idarehanesi, hürriyetin şuaatı
altında «Her kesin iqametgâhı taarruzdan masundır» qanunı hüküm sürmeye
başladığı bir zamanda basıldı. Talandı. Yazıhanede bulunan bütün evraq ve
muqalât müsadere idildi...
Komite memleketde anarşi çıqacağını düşünerek buña
meydan virilmemesi için, Qırım Atlı Polkınıñ arqada bulunan qısımınıñ Qırıma
ketirilmesini istedi. Harbiye Nezaretiniñ bu hususda müsaide müsaadesini de
aldı. Faqat Qırımın başında bulunan memurlar komissarlar:
«Tatarlar hakimiyeti kendi ellerine alacaqar» diye
hükümet-i muvaqqataya şikâyetnameler könderdiler... Bütün quvetleriyle polkın
Qırıma kelmemesine çalışdılar.
Dirken bolşevikler qıyamı başladı. Merkez dağıdıldı,
hükümet yıqıldı. Paytahtlarda başlamış anarşi ve Dahiliy Muharebe bütün
memleketi ve bu cümleden olaraq Qırım yarımadasını da tehdide başladı. İcra
Komitesi Qırımda anarşi çıqarmamaq için bir inqilâb heyeti teşkil ile buña
başqa milletler teşkilâtlarından da vekiller davet itdi. İcabet iden yalıñız ukrayinler
oldı. Hükümet-i merkeziyeniñ yıqılmasıyle onıñ vilâyetlerdeki şubeleri
maqamında olan komissarlıqlardır. Quvetden, nüfuzdan düşdi. Anarşiniñ ögini
almaqdan aciz qaldı. Qırımtatarları İcra Komitesi Tavrida vilâyetiniñ Melitopol
şeherine qadar kelen anarşiyi Qırıma bıraqmamaq ve Qırımdaki sulh, asayişı
muhafaza itmek her milletin malını, namusını, hayatını ve canını qurtarmaq için
milliy militsiya teşkil iderek Qırımın merkezi olan Aqmescidi müdafaaya
başladı. Şeherin nizam ve intizamınıñ saqlanmasını şeher komendantı tatar
batalyonına havale itdi. Bu sayede mahalliy bolşeviklerin çıqışlarınıñ ögi
alındı.
Faqat, eski idare közligi ile baqmaya alışmış bazı
vatandaşlarımız tatarların bu güzel işlerine başqa mana virdiler. «Tatarlar
«vlasti» kendi ellerine alıyurlar...» didiler. Hele Qırım Atlı Polkınıñ yola
çıqtığı haberi kelince tatarlar haqqında bir çoq qara fikirler, yalan şayialar,
daha doğrısı provakatsiyalar dağıdılmaya başladı. Noyabr 3-de Bağçasarayda
olmış milliy debdebe haqqında ne qadar çirkin yalanlar söylendigi malümdir.
Faqat o kün bunları söyleyenleri yüzleri qızardı.
Şimdi de: «tatarlar artıq Qırımı kendi ellerine alub
Qırımda yalıñız kendi hakimiyetlerini yaşatmaya ve başqa milletleri mahküm
itmeye qalqışdılar» ve: «tatarlar başqa milletleri şöyle yapacaq, böyle idecek»
diye ğayr milletler arasında fitne ve fesad tuhmları ekdikleri kibi şayed
tatarlar Qırımın idaresini ve hakimiyetini kendi ellerine alırsa Qırımda mevcud
bütün müesseselerde hıdmet iden rusların ve müsliman olmayan milletlerin terk-i
işğal itmeleri hususında teşviqatda bulunıyurlar...
Noyabr 10-da ictima itmiş Amele ve Askerler
Şurasında inqilâbçı «Semönova» hanım bile müslimanlara «şovinistler» dimekden
çekinmemişdir.
Ne yañlış fikirler, ne fena su-i tefsirler! Biz
bütün varlığımızle bu yalanları, bu şayiaları protesto iderek açıqdan açığa
umum qırımlılara diyurız:
Başda Qırımın müftisi ve Qırım Müslimanları İcra
Komitesiniñ reisi Çelebicihan efendiniñ bu nushamızda derc itdigimiz nutqını
oquyıñız. Tatarlar hiç bir zaman
başqasını taht-ı esaretde bulundırmadığı kibi bundan böyle dahi başqa
milletlerden ayırılmaq ve hakimiyeti kendi eline alaraq diger milletleri mahküm
itmek fikirinde degildir. Qırımtatar umum Qırım yani Qırımda yaşayan bütün
milletlerle beraber kitmek isteyur. Qırımı qırımlılarle beraber anarşiden
qurtarmaq arzu idiyur. Qırımı umum qırımlılarle birlikde ihya, imar ve mesud
itmek dileyur. Tatarlar nasıl başqa milletlerle beraber felâket çekmiş ise,
yine onlarle beraber mesud olmaq isteyur. Keliñiz, diyur, birlikde Qırımı
qurtaralım, birlikde onı idare idelim. Birlikde mesud olalım... diyur.
Umum Rusiye qardaşlar, vatandaşlar muharebesi ateş
içinde qalmış iken, memleketin her tarafında anarşi hüküm sürmekde iken Qırımın
da bu felâkete maruz qalacağını düşünen tatar bütün quvetiyle onıñ muhafazasına
teşebbüs iderek bütün milletleri teşrik masaya davet itdi. Çünki tatar nizamsız
ve intizamsız yaşayamaz, o anarşiyi sevmez. O kendisinde bulundığı memleketde
sulh ve asayişın, sükünet ve rahatlığın bozulmasına razı olamaz.
Qırımtatar inqilâb ve hürriyetin doğurdığı büyük
sotsialist fırqaları tarafından tasdıq ve ilân idilen «Her millet kendi işini
kendi körmelidir» şiarını kendisine destur-ı ittihaz idirek işe başladı ve
qomşularını da davet itdi ve idiyur. Ukrayina vumhuriyeti ilân idildikden soñra
ise Qırım merkezi Rusiyeden tamamen ayırılub uzaqlaşdı. Qırımın nizam ve
intizamına aid talimatlar bundan soñra başqa yerden kelemeyeceginden ve kelse
dahi bu talimatlar Qırım ve qırımlılarınıñ ihtiyacatına muvaffaq
olamayacağından Qırım Müslimanları İcra Komitesi keçirdigimiz tarihiy künlerin
ehemmiyetini nazar diqqata alaraq Qurul tayin açılmasına da baqmayub noyabr
11-de yarı giceden soñra «Qırım qırımlılarıñdır» şiarını qabul ve ilân itmeye
qarar virdi. Komite bu qararını umum qırımlılara yani tatarlara, ruslara,
ermenilere, rumlara, yehudilere, qaraimlere, nemselere ve bütün teşkilât-i
milliye ve umumiyeye arz itmeye, Qırımın idaresi ve muhafazası için umum
qırımlıları işe davet itmeye qarar virdi.
Tatarlar: «Qırım tatarlarıñdır» dimeyub «Qırım
qırımlılarıñdır» didi. Bu halda ötede-beride «tatarlar şöyle yapacaq, böyle
idecek» diye dürlü yalanlar neşir itmek fitnecilik ve fesadcılıqdan başqa bir
şey degildir. Bütün siyasiy fırqalar bilhassa inqilâbçı fırqaların programları
da muhtariyeti tanımayurmı? Eger o inqilâbçılar, o sotsialistler haqiqiy
inqilâbçı, haqiqiy sotsialist iseler bunda qorqılacaq, ürkecek bir şey
olmadığını pek eyi bilseler kerekdir...
|