Yardımıñızğa muhtac olğan qırımtatar milliy neşirlerimiz

Qırımtatar tili ağır vaziyette olğanı haqqında her keske bellidir. Tilimizni canlandıruv işinde hocalarnıñ rolü pek büyük. Lâkin hocalarnıñ işleri pek qıyın: derslikler talebeler içün murekkep, usuliy qullanmalar az, körgezmeler yoq derecede.

Bu qıyınlıqlarnı çezmek maqsadınen yañı usuliy mecmua çıqarmağa qarar ettik. Onıñ adı «Ana tili ocalarına».

Mecmuağa ilâve olaraq DVD disk berile. Diskke qırımtatar tili ve edebiyatı dersleri ve tedbirler içün video, audio materiallar, körgezmeler kirsetilgen. Böyle komplektniñ fiyatı 15 grivna, her hangi posta bölüginde abune olmaq mümkün. Abune indeksi – 49968.

Birinci komplekt çıqtı. Mecmuada usuliy maqaleler bar, «Taqvim sahifeleri» bolüginde belli qırımtatar şahıslarımızğa ve mühm hadiselerge bağışlap ders konspektleri, tedbir stsenariyler, metinler, çeşit vazifeler bar. İsmail Gasprinskiy, Noman Çelebicihan, Hamdi Giraybay, Bekir Osmanov, Musa Mamut kibi şahıslar haqqında metinler, ressam Mamut Çurlunıñ icadı, Navrez bayramı haqqında ve daha başqa materiallar mevcut.

Mecmuanıñ elektron adresi: asleyla@mail.ru